આણંદમાં ફરી ઉકળાટ: તાપમાન ફરી ૪૦°Cને સ્પર્શ્યું!
આણંદ જિલ્લામાં એપ્રિલની શરુઆતથી જ ગરમીનો પારો ૪૦ પ્લસ પહોંચ્યો હતો. જેથી કાળઝાળ ગરમીથી સૌ ત્રસ્ત બન્યા હતા. દરમ્યાન ત્રણેક દિવસ ગરમીના પારામાં થોડો ઘટાડો થયા બાદ આજે પુન: તાપમાનનો પારો ૪૦ પહોંચ્યો હતો. જયારે લઘુત્તમ તાપમાન ર૧.૬, ભેજનું પ્રમાણ ૬૬ ટકા અને પવનની ઝડપ પ્ર.ક. ૭.પ કિ.મી. રહી હતી. બપોરે ગરમ પવનોથી બચવા માટે કામસર બહાર નીકળેલા શહેરીજનો ટોપી, માસ્ક સહિતના ઉપાયો અજમાવ્યાનું જોવા મળ્યું હતું.
હવામાન વિભાગની આગાહીનુસાર આગામી બે અઠવાડિયા સુધી જિલ્લામાં ધોમધખતી ગરમીની સંભાવના છે. સાથોસાથ ર૦થી રપ કિ.મી. પ્રતિ કલાકની ઝડપે ફૂંકાનાર ગરમ પવનોના કારણે લૂની સંભાવના છે. ગરમીનો પ્રકોપ વધવાની આગાહીના પગલે કેટલીક એડવાઇઝરી પણ જાહેર કરવામાં આવી છે.
જો કે આણંદ જિલ્લામાં આજથી આગામી ૩૧ મે,ર૦રપ સુધીમાં ત્રણથી ચાર વખત હિટ વેવની સંભાવના વ્યકત કરવામાં આવી ેછે. તેમાંયે હિટ વેવ ત્રણથી વધુ દિવસ સુધી અસર વર્તાવશેની આગાહી છે. રાજય સરકારે પણ હિટ વેવને સાયલન્ટ ડિઝાસ્ટર તરીકે ગણાવ્યો છે. જેના પગલે તકેદારીના પગલંા માટે ખાસ ફોર્સની રચના કરવામાં આવી છે. આણંદ જિલ્લામાં જિલ્લા હીટ એકશન ટાસ્ક ફોર્સની રચના કરવામાં આવી છે. જેમાં અધ્યક્ષપદે કલેકટર સહિત વિવિધ વિભાગના અધિકારી મળીને ૩૪ સભ્યોની નિયુકિત કરવામાં આવી છે. આ ટાસ્ક ફોર્સ દ્વારા હિટ વેવ દરમ્યાન તકેદારીના પગલાં લેવા, સૌથી વધુ અસર ધરાવતા વિસ્તારોમાં સ્થાનિકોને આરોગ્યલક્ષી રાહત રહે તે માટેના આયોજન કરવામાં આવશે.
આણંદ જિલ્લામાં ૩૧ મે,ર૦રપ સુધીમાં ત્રણથી ચાર વખત હિટવેવ ત્રણથી વધુ દિવસ રહેવાની સંભાવના હવામાન ખાતા દ્વારા વ્યકત કરવામાં આવી છે. જેને ધ્યાને લઇને રચના કરાયેલ ડિસ્ટ્રીક હિટ એકશન ટાસ્ક ફોર્સ દ્વારા આયોજન કરાશે. જેમાં ખાસ કરીને સ્ટેટ હાઇવે સહિતના માર્ગો પર પીવાના ઠંડા પાણીની પરબો સ્થાનિક સેવાકીય સંસ્થાઓના માધ્યમથી ઉભી કરાશે. શહેરોમાં પણ લોકભાગીદારીથી છાશ કેન્દ્રો ઉભા કરાશે. ઉપરાંત હિટ વેવનો ભોગ બનેલ વ્યકિતને તાત્કાલિક સારવાર ઉપલબ્ધ થાય તે માટેની આગોતરી વ્યવસ્થા ઉભી કરાશે.
ખેડા જિલ્લામાં આજે ગરમીનો પારો ૪૧ ડિગ્રીને આંબી ગયો હતો. સવારથી જ ઉકળાટભર્યા માહોલના કારણે બપોરના સમયે શહેરોના રસ્તાઓ પરની અવરજવરમાં ખાસ્સો ઘટાડો જોવા મળ્યો હતો. ગામોમાં પણ કામસરની જૂજ અવરજવર હતી. આકરી ગરમીના કારણે લોકો બપોરના સમયે કામ વગર બહાર નીકળવાનું ટાળી રહ્યા છે. આકરી ગરમીના કારણે લોકોને હિટ સ્ટ્રોકથી બચવા માટે તંત્ર દ્વારા એડવાઇઝરી જાહેર કરવા સાથે તમામ કચેરીઓને તકેદારીના પગલાં લેવા અપીલ કરી છે. હવામાન વિભાગની આગાહીનુસાર એપ્રિલના અંત અને મે માસમાં તાપમાનનો પારો વધુ ઉંચે પહોંચશે. જેથી નાગરિકોને આરોગ્યલક્ષી સાવચેતી દાખવવા અનુરોધ કરાયો છે.
