પેટલાદની એસ.એસ. હોસ્પિટલનો નવો રેકોર્ડ: એક જ મહિનામાં 17,942 ઓપીડી કેસ, આયુષ્યમાન યોજના હેઠળ ₹53.94 લાખનો સૌથી મોટો ક્લેઇમ
પેટલાદ: પેટલાદની શ્રી સયાજી (એસ.એસ.) હોસ્પિટલએ આરોગ્યસેવાના ક્ષેત્રે નોંધપાત્ર સિદ્ધિ હાંસલ કરી છે. માર્ચ-2025ના હોસ્પિટલમાં કુલ 17,942 આઉટડોર દર્દીઓ (ઓપીડી)ના કેસ નોંધાયા છે, જ્યારે 4,943 દર્દીઓને ઇનડોર સારવાર માટે દાખલ કરવામાં આવ્યા હતા. આ સાથે, આયુષ્યમાન ભારત યોજનાના રૂ. 53.94 લાખના ક્લેઇમ સાથે હોસ્પિટલએ તેના ઇતિહાસમાં સૌથી ઊંચો રેકોર્ડ નોંધાવ્યો છે.
વિશિષ્ટ સેવાઓ અને સર્વસામાન્યની વહેચણી:
સિવિલ સર્જન ડૉ. ગિરીશ કાપડિયાના જણાવ્યા અનુસાર, હોસ્પિટલ વિવિધ તબીબી વિભાગોમાં નિષ્ણાત સેવાઓ પૂરી પાડી રહી છે. તેમાં પ્રસૂતિ વિભાગ, બાળરોગ, માનસિક રોગો, જનરલ સર્જરી અને ફિઝિશિયન ઓપીડીનો સમાવેશ થાય છે. ઉપરાંત, આંખ, દાંત અને હાડકાના રોગોની સારવાર માટે પણ તજજ્ઞ સેવાઓ ઉપલબ્ધ છે.
આયુષ્યમાન યોજના હેઠળ મફત સારવાર:
ડૉ. કાપડિયાએ વધુમાં જણાવ્યું કે, આયુષ્યમાન કાર્ડ ધરાવતાં દર્દીઓને તમામ તબીબી સેવાઓ વિનામૂલ્યે ઉપલબ્ધ કરાવવામાં આવી રહી છે. ખાસ કરીને ડીઇઆઈસી (DEIC) વિભાગ તથા ક્લબ ફૂટના દર્દીઓ માટે વિશેષ તબીબી સેવાઓ પણ અહીં કાર્યરત છે. 
સેવાને ધ્યેય બનાવી સફળતા તરફ આગેકૂચ:
હોસ્પિટલના આ રેકોર્ડબ્રેકિંગ આંકડાઓ માત્ર સંખ્યાબળ પૂરતા નથી, પણ તેનો મૂળ સંદેશ આરોગ્યસેવાના પ્રત્યેની નિષ્ઠા અને જનહિત માટેના વિઝનનો પરિચાયક છે. એસ.એસ. હોસ્પિટલ હવે માત્ર પેટલાદ જ નહિ, સમગ્ર પ્રદેશ માટે આરોગ્યસેવાની મજબૂત મિસાલ બની રહી છે.
