આણંદ લોકસભા બેઠકના કોંગ્રેસના ઉમેદવાર અને પૂર્વ સમર્થકોની રેલી સાથે ભરતસિંહે ઉમેદવારી નોંધાવી
કરમસદ ખાતે સરદાર પટેલની પ્રતિમાને હાર પહેરાવી નમન કર્યું : લોટિયા ભાગોળે ભાથીજી મહારાજના આશીર્વાદ મેળવ્યા
આણંદ લોકસભા બેઠકના કોંગ્રેસના ઉમેદવાર કેન્દ્રીય મંત્રી ભરતસિંહ સોલંકીએ લોટીયા ભાગોળ ખાતે આવેલ ભાથીજી મંદિરેથી વિશાળ રેલી યોજી પોતાનું ઉમેદવારી પત્ર ૧૨.૩૯ના વિજય મુહુર્તમાં જિલ્લા કલેકટર દિલીપ રાણાને સુપરત કર્યું હતું. ત્યારે તેમની સાથે ગુજરાત પ્રદેશ પ્રમુખ અમીતભાઈ| ચાવડા, ઘારાસભ્યો કાંતિભાઈ સોઢા પરમાર, પુનમભાઈ પરમાર, રાજેન્દ્રસિંહ પરમાર, નિરંજનભાઈ પટેલ, આણંદ જિલ્લા પંચાયત પ્રમુખ નટવરસિંહ મહીડા, કપિલાબેન ચાવડા, તાલુકા પંચાયતના અધ્યક્ષો, હોદ્દેદારો તેમજ મોટી સંખ્યામાં કોંગ્રેસના કાર્યકરો જોડાયા હતા.
આણંદ લોકસભા બેઠકના કોંગ્રેસના ઉમેદવાર ભરતસિંહ સોલંકીની રેલીમાં ઉપસ્થિત રહેલા પ્રદેશ કોંગ્રેસ પ્રમુખ અમીતભાઈ ચાવડાએ જણાવ્યું હતું કે આ વખતની ચૂંટણીમાં કોંગ્રેસને સારામાં સારી બેઠકો પર વિજય થશે. ગુજરાત સહિત સમગ્ર દેશમાં પરિવર્તનની લહેર ચાલી રહી છે. તેઓએ વધુમાં જણાવ્યું હતું કે રાહુલ ગાંધી દ્વારા બહાર પાડવામાં આવેલા મૅનીફેસ્ટોને વચન સંકલ્પ ગણાવીને જણાવ્યું હતું કે કોંગ્રેસ પાર્ટીએ જે વચનો આપ્યા છે તે સરકાર બનતા જ પૂરા કરાશે. 
કોંગ્રેસ પાર્ટીએ તમામ વર્ગોને ધ્યાનમાં રાખીને મેનીફેસ્ટો બનાવ્યો છે જેથી ગુજરાત અને દેશની પ્રજા કોંગ્રેસને મત આપીને વધાવી લેશે.
આ પ્રસંગે કોંગ્રેસના ઉમેદવાર ભરતસિંહ સોલંકીએ જણાવ્યું હતું કે આ ચૂંટણી દેશના લોકોના ઉજ્જવળ ભવિષ્ય માટેની ચૂંટણી છે. રાહુલ ગાંધીના નેતુત્વમાં દેશની જનતા કોંગ્રેસને સત્તા સ્થાને બેસાડવા મક્કમ બની છે.
તેમણે વધુમાં કહ્યું કે દેશને નેતૃત્વ પૂરું પાડનાર સરદાર પટેલ સાહેબની જન્મભૂમિ પરથી મને ચોથી વખત ચૂંટણી લડવા માટે જે તક આપવામાં આવી છે તે બદલ સૌનો આભાર માનું છું.
આજે સવારે કૉંગ્રેસના ઉમેદવાર ભરતસિંહ સોલંકી પોતાના નિવાસ સ્થાનેથી બોરસદના સૂર્યમંદિર પહોંચ્યા હતા. ત્યાંથી કરમસદ પહોંચીને સરદાર વલ્લભભાઈ પટેલની પ્રતિમાને પુષ્પાંજલિ અર્પણ કર્યા બાદ આણંદ શહેરના લોટિયા ભાગોળ ખાતે આવેલા ભાથીજી મંદિરે પહોંચી દર્શન કરી ભવ્ય રેલી યોજી હતી. આ રેલી ટાવર બજારથી ગામડી વડ, નગરપાલિકા, સ્ટેશન રોડ, અમૂલ છે છે પરથી ગણેશ ચોકડી પહોંચી હતી. રેલીમાં કોંગ્રેસના મોટી સંખ્યામાં કાર્યકરો, યુવાન યુવતીઓ તેમજ મહિલાઓ જોડાયા હતા.
ત્યારબાદ ઉમેદવાર ભરતસિંહ સોલંકી પ્રદેશ પ્રમુખ અમીતભાઈ ચાવડા, ધારાસભ્યો કાન્તિભાઈ સોઢા પરમાર, નિરંજનભાઈ પટેલ, રાજેન્દ્રસિંહ પરમાર, પુનમભાઈ માધાભાઈ પરમાર તથા સંગઠનના હોદ્દેદારો સાથે કલેકટર કચેરીએ પહોંચી ૧૨.૩૯ના શુભ મુહુર્તમાં પોતાનું ઉમેદવારી પત્ર ચૂંટણી અધિકારી દીલીપભાઈ રાણાને સુપરત કર્યું હતું.
