શાળાના વિદ્યાર્થીઓએ એકત્ર કરી એક લાખ પ્લાસ્ટિક બોટલો, બનાવી કમ્પાઉન્ડ વોલ
આણંદ જિલ્લાને પ્લાસ્ટિક મુક્ત બનાવવાના અભિયાન અંતર્ગત એક નવતર પહેલ કરવામાં આવી છે. આણંદના પ્રાંત અધિકારી મયુર પરમારના નેતૃત્વમાં આ પહેલ હાથ ધરવામાં આવી છે.
આણંદ અને ઉમરેઠ તાલુકાની પ્રાથમિક શાળાઓના વિદ્યાર્થીઓએ જાન્યુઆરી અને ફેબ્રુઆરી મહિના દરમિયાન એક લાખ જેટલી વેસ્ટ પ્લાસ્ટિકની બોટલો એકત્ર કરી. આ બોટલોનો ઉપયોગ કરીને રાજોડપુરા પ્રાથમિક શાળાની કમ્પાઉન્ડ વોલ બનાવવામાં આવી છે.
વિશ્વ પર્યાવરણ દિવસે રાજોડપુરા પ્રાથમિક શાળાના વિદ્યાર્થીઓના હસ્તે આ અનોખી કમ્પાઉન્ડ વોલનું લોકાર્પણ કરવામાં આવ્યું. પ્રાંત અધિકારી ડૉ. મયુર પરમારે જણાવ્યું કે આ પ્રયોગનો મુખ્ય હેતુ વિદ્યાર્થીઓમાં પ્લાસ્ટિક પ્રદૂષણ અંગે જાગૃતિ લાવવાનો છે. 
કાર્યક્રમ દરમિયાન સિંગલ યુઝ પ્લાસ્ટિકના પ્રતિબંધ વિશે પણ જાગૃતિ ફેલાવવામાં આવી. શાળા કમ્પાઉન્ડમાં વૃક્ષારોપણ પણ કરવામાં આવ્યું. આ પ્રસંગે મામલતદાર ચાર્મી રાવલ, ફોરેસ્ટ ઓફિસર, શિક્ષકો, વિદ્યાર્થીઓ અને નગરજનો ઉપસ્થિત રહ્યા હતા.આ પહેલ આણંદ જિલ્લા કલેકટર પ્રવીણ ચૌધરીના માર્ગદર્શન હેઠળ હાથ ધરવામાં આવી છે. આ પ્રોજેક્ટ દ્વારા વિદ્યાર્થીઓને વેસ્ટમાંથી બેસ્ટ બનાવવાની પ્રેરણા મળી છે.
