લાઈટવાળું હેલ્મેટ, ભારે અસર: 1.5 કરોડનું વાર્ષિક ટર્નઓવર: બ્લૂટૂથ, વોઇસ કૉલિંગ અને વધુ
‘આ લગભગ 2010ની વાત છે. મારો એક મિત્ર હતો- રવિ. અમે બંને સ્કૂલના મિત્રો હતા. ગાઢ મિત્રતા હતી. એક રાત્રે રવિ દિલ્હી-જયપુર હાઇવે પર તેના ઘરે જઈ રહ્યો હતો. રસ્તામાં એક જગ્યાએ ઊભો હતો, તે દરમિયાન રોડ રોલર તેના ઉપર ફરી વળ્યું હતું.
તે ત્યાં જ મૃત્યુ પામ્યો. આ ઘટનાને કારણે હું ઘણા મહિનાઓ સુધી ડિપ્રેશનમાં રહ્યો. હું એક વાર રવિના પરિવારને મળવા ગયો હતો, પણ ફરીથી ત્યાં કેવી રીતે જઈ શકું?
સાચું કહું તો, સાચી મિત્રતા ફક્ત સ્કૂલમાં જ મળે છે. આ મિત્રતા ત્યારે બને છે જ્યારે આપણી પાસે કંઈ હોતું નથી. તપાસ દરમિયાન, રોડ-રોલર ડ્રાઇવરે કહ્યું કે રાત્રે તેને દેખાયું નહીં કે તેની પાછળ કોઈ ઊભું હતું. 
પછી હું વિચારવા લાગ્યો, કદાચ! જો ડ્રાઈવરે મારા મિત્રને સમયસર જોયો હોત, તો તે આજે જીવતો હોત.
હું હાલમાં રાજસ્થાનની રાજધાની જયપુરમાં છું. રિતેશ કોચેતા કેટલીક પ્રોડક્ટ્સ બતાવી રહ્યા છે. આ બધી રોડ સેફ્ટી કેર પ્રોડક્ટ્સ છે. તે કહે છે, ‘મારા મિત્રના મૃત્યુ પછી, મેં આ પ્રકારની પ્રોડક્ટ બનાવવા વિશે વિચાર્યું હતું.
રિતેશ ‘ક્રૂઝર’ ના ફાઉન્ડર છે, જે સેફ્ટી કેર પ્રોડક્ટ બનાવતી કંપની છે. તે જે પ્રોડક્ટ બતાવી રહ્યા છે તેમાં લાલ ઝબકતી લાઇટો છે.
તેઓ કહે છે, ‘જ્યારે આપણે રાત્રે રસ્તા પર દેખાશું, ત્યારે જ આપણે બચી શકીશું.’ ગાડી ચલાવતી વખતે, આગળ લાઇટ ચાલુ હોય છે, પણ પાછળ…?
હવે જો મારી પાછળ ઊભેલી વ્યક્તિને હું દેખાતો હોઈશ, તો જાણી જોઈને તો અકસ્માત કરવા માંગીશ નહીં. કોઈ કોઈને મારવા માંગતું નથી.
મેં સૌથી પહેલી પ્રોડક્ટ આ ખભા પર પહેરી શકાય તેવી બનાવી હતી. તેમાં લાઇટો લગાવેલી છે. જો કોઈ રાત્રે વાહન ચલાવતી વખતે તેને પહેરે છે, તો તેની પાછળની વ્યક્તિ તેને અંધારામાં પણ જોઈ શકે છે.
મેં પહેલીવાર 2017માં આ પ્રકારની પ્રોડક્ટ પર કામ કરવાનું શરૂ કર્યું હતું.
રિતેશ મને તેનું યુનિટ બતાવી રહ્યો છે. એક ડેસ્ક પર લગભગ એક ડઝન હેલ્મેટ રાખવામાં આવ્યાં છે. બીજા ભાગમાં કેટલોક સ્ટાફ અસેમ્બલિંગ કરી રહ્યો છે. LED લાઇટ માટે બોર્ડ તૈયાર કરવામાં આવી રહ્યાં છે. તેને સેફ્ટી કેર પ્રોડક્ટ, હેલ્મેટ સાથે સેટ કરી રહ્યા છે.
રિતેશ કહે છે, ‘તમે ઘરના બેઝમેન્ટમાં આ કંપની જોઈ રહ્યા છો.’ પપ્પાનો જ્વેલરીનો બિઝનેસ છે. મને હંમેશાં રિસર્ચ અને ઈનોવેશન પર કામ કરવાનો શોખ રહ્યો છે. તમે માનશો નહીં, મારી પાસે 1998થી એક લેબ રૂમ છે. આમાં, હું કચરાની વસ્તુઓને જોડી-તોડીને કંઈક ને કંઈક બનાવતો રહેતો હતો.
હું વૈજ્ઞાનિક બનવા માંગતો હતો. આ લગભગ 2004-05ની વાત છે. 12મા ધોરણ પછી, હું એરોનોટિકલ એન્જિનિયરિંગ માટે ઉદયપુર ગયો. તે સમયે મોટાભાગના લોકોને આ વિષય વિશે ખબર પણ નહોતી. અભ્યાસ તો બહુ દૂરની વાત છે.
મેં મારા કોલેજકાળ દરમિયાન જેટ એન્જિન પણ બનાવ્યું હતું. મારો અભ્યાસ પૂર્ણ કર્યા પછી, મેં વિવિધ મંત્રાલયો અને ઊર્જા વિભાગો સાથે કામ કરવાનું શરૂ કર્યું.
હેલ્મેટ એક સ્ટેન્ડ પર મૂકવામાં આવે છે. આ હેલ્મેટની પાછળ એક લાઇટ ફિટ કરેલી છે. જ્યારે પૂછવામાં આવ્યું ત્યારે રિતેશ કહે છે, ‘જ્યારે કોઈ વ્યક્તિ આ પ્રકારનું સેફ્ટી કેર બેસ્ડ હેલ્મેટ પહેરે છે ત્યારે તેને કેવું લાગશે.’ લાઈટનું રિફ્લેક્શન કેવું હશે?
પાછળથી વાહન ચલાવતી વ્યક્તિને આ લાઈટ કેવી લાગશે? ધારો કે એક ટ્રક કે બસ ડ્રાઈવર છે. તેમનાં વાહનોની ઊંચાઈ વધારે છે. આવી સ્થિતિમાં, તેઓ હેલ્મેટની લાઈટ તેમને દેખાશે કે નહીં?
આ બધા એંગલ પર રિસર્ચ કર્યા પછી જ અમે ફાઈનલ પ્રોડકેટ લઈને આવીએ છીએ. અમે એવી પ્રોડક્ટ બનાવી રહ્યા છીએ કે જો કોઈ લાઈટ બંધ કરી દે તો કોઈને ખબર પણ નહીં પડે કે તે બજારમાં મળતા હેલ્મેટથી અલગ છે.
તેની અંદર લાઇટ્સ ખૂબ જ સચોટ રીતે ફિટ કરવામાં આવી છે.
કેવી રીતે લાઈટ થાય છે?
હેલ્મેટના એક ભાગ પરનું બટન દબાવતા રિતેશ કહે છે, ‘આખી સિસ્ટમ ચાર્જિંગ પર આધારિત છે.’ એક કલાક ચાર્જ કર્યા પછી, વ્યક્તિ આવા હેલ્મેટનો ઉપયોગ 28 કલાક સુધી કરી શકે છે.
અમે કેટલાક હેલ્મેટ વાયરલેસ પણ બનાવ્યાં છે. તે બ્લૂટૂથ દ્વારા કનેક્ટેડ છે. વાત કરવા માટે ફોન કાન પર રાખવાની જરૂર નથી.
રિતેશના હાથમાં કેટલાંક જેકેટ પણ છે. આ જેકેટ કન્ટ્રક્શન સાઈટ પર કામ કરતા વર્કરોના ડ્રેસ જેવું લાગે છે.
રિતેશ કહે છે, ‘અમે આમાં પણ LED લાઇટ લગાવી છે, જેથી કોઈપણ વર્કર બાંધકામ સ્થળે પણ સેફ્ટી સાથે કામ કરી શકે.’ જો રાત્રે વાહનની અવરજવર હોય, તો તે દૂરથી દેખાય કે કોઈ ત્યાં ઊભું છે.
તમે તેને કેવી રીતે વેચો છો?
‘મને પણ રાઈડિંગનો શોખ છે.’ શરૂઆતમાં, જ્યારે મેં પ્રોડક્ટ બનાવવાનું શરૂ કર્યું, ત્યારે હું તેને મારા સમુદાયના લોકોને ટેસ્ટિંગ માટે મફતમાં આપતો હતો. પાછળથી તેઓને તે એક જરૂરી પ્રોડક્ટ લાગવા લાગી.
ઘણા લોકો એવા પણ જોવા મળ્યા જેમણે કહ્યું કે સેફ્ટી કેર પ્રોડક્ટને કારણે તેમના જીવ બચી ગયા અથવા તેમણે અન્ય લોકોને અકસ્માતોથી બચાવ્યા. દેશભરમાં 80 હજાર રાઇડર્સ છે. અમે તેમની સાથે પ્રોડક્ટ પણ વેચીએ છીએ.
અમારી પાસે ઈ-કોમર્સ પ્લેટફોર્મ પર પણ અમારી સર્વિસ છે. હવે અમે દેશભરના મુખ્ય હેલ્મેટ ઉત્પાદકો સાથે ડીલ કરી રહ્યા છીએ. અમારી કંપની ભારતમાં પહેલી એવી કંપની છે જે આવી LED આધારિત સેફ્ટી કેર પ્રોડકેટ્સ બનાવી રહી છે.
અમે વાર્ષિક આશરે 1.5 કરોડ રૂપિયાનો બિઝનેસ કરી રહ્યા છીએ. સૌથી મોટો સંતોષ ત્યારે મળે છે જ્યારે આ હેલ્મેટ કોઈનું જીવન બચાવે છે. ભારતમાં 40 ટકા અકસ્માતો રાત્રે થાય છે. એટલે કે ઓછી વિઝિબિલિટીના કારણે થઈ રહ્યા છે.
