આણંદ: હોલસેલ મેડિસિન્સની એજન્સીથી દવાઓ ચોરી કરી વેચી, એકાઉન્ટન્ટને ૨ વર્ષની કેદની સજા
આણંદ : આણંદ ખાતે હોલસેલ મેડિસિન્સની એજન્સીની દુકાનમાં એકાઉન્ટન્ટ તરીકે કામ કરતા અડાસના શખ્સેએ કિંમતી દવાઓ ચોરી કરી અન્ય મેડિકલ એજન્સીને વેચી દીધી હતી. આ અંગેની જાણ થયા બાદ એકાઉન્ટન્ટે આપેલો રૂા. ૮.૫૦ લાખનો ચેક રિટર્ન થતા કેસ કરાયો હતો. જે અંગે એકાઉન્ટન્ટને બે વર્ષની કેદની કોર્ટે સજા ફટકારી છે. ચેકની પકમ ૩૦ દિવસમાં ચૂકવી દેવા પણ હુકમ કર્યો છે.
આણંદ ખાતે ઈલા મેડિકલ એજન્સીના વહીવટકર્તા વિરલકુમાર પંકજકુમાર મહેતા હોલસેલ મેડિસિન્સનો વેપાર કરે છે. જેમની ત્યાં દિગ્વીજય મનુભાઈ રાજ (ઉં.વ.૨૭, રહે. ગોહેલવગો, અડાસ, તા. આણંદ) ૧૧ વર્ષથી ડિલિવરી બોય કમ એકાઉન્ટન્ટ તરીકે નોકરી કરતો હતો. એજન્સીવાળી જગ્યાની ચાવીઓ પણ દિગ્વીજય રાજને આપેલી હતી. એજન્સીમાંથી કિંમતી દવાઓની ચોરી થયાનું ધ્યાને આવ્યું હતું. તપાસ કરતા તા. ૨૯-૭-૨૦૨૨ના રોજ દિગ્વીજયે રાતે એજન્સીની દુકાન ખોલી કેમેરા બંધ કરી દીધા હતા. બાદમાં કિંમતી દવાની કમ્પ્યુટરમાં વેસ્ટેજ તરીકે ખોટી એન્ટ્રી પાડી દવાઓ ચોરી ગયો હતો. દવાઓ માતરના સાગર મેડિસિનના માલિક ઈન્દ્રજીતસિંહ લાખાભાઈ સોઢાને બિલ વગર વેચી હોવાનું દિગ્વીજયે કબુલાતનામું તા. ૧-૮-૨૦૨૨ના રોજ લખી આપ્યું હતું. બાદમાં દવાઓની લેણી રકમનો રૂા. ૮.૫૦ લાખનો અને રૂા. ૪,૩૯,૫૦૦ના ચેક આપ્યા હતા. જેમાંથી રૂા. ૮.૫૦ લાખનો ચેક તા. ૨-૧૧-૨૦૨૨ના રોજ ફંડ ઈનસફિસિયન્ટના શેરા સાથે રિટર્ન થયો હતો. જે અંગે ચેક રિટર્નનો કેસ કરાયો હતો.
