ખેડા જિલ્લામાં મહેસૂલી કર્મચારીઓની પડતર માંગણીઓ મુદ્દે કલેક્ટરને આવેદનપત્ર અપાયું
ખેડા જિલ્લામાં મહેસુલી કર્મચારીઓએ પોતાના પડતર માંગણીઓ સંદર્ભે આજરોજ બુધવારે જિલ્લા કલેકટર કચેરી ખાતે આવી પહોંચી આવેદનપત્ર કલેક્ટરને આપ્યું હતું. ખેડા જિલ્લા રેવન્યુ એસો.ના પ્રમુખ મિતેશભાઇ, મહામંત્રી પ્રદિપસિંહ સહિતના આગેવાનો તેમજ કર્મચારીઓએ આપેલા આવેદનપત્ર માં જણાવ્યું છે કે વિભાગના પરિપત્રથી પ્રસિધ્ધ કરેલ પ્રવરતાયાદીમાં જે તે સમયે રહેલ ક્ષતિઓના કારણે તેમજ આ કામે રજુ થયેલ વાંધાઓની સુનાવણી અને નિર્ણય થયેલ ન હોય, વિભાગકક્ષાએ જરૃરી સુધારો કરી નવેસરથી યાદી બનાવવી જરૃરી છે. તેમજ તે આધારે તાત્કાલિક નાયબ મામલતદારથી મામલતદારના પ્રમોશન આપવા કાર્યવાહી કરવામાં આવે.
રાજ્યમાં ફરજ બજાવતા કર્મચારીઓના જિલ્લા ફેર બદલીની વિભાગ ખાતે પડતર રજૂઆતોેનો તાત્કાલિક નિર્ણય કરવો, હવે પછી રજુ થતી જિલ્લા ફેર બદલીની નવી અરજીઓ માટે ઓનલાઈન પ્લેટફોર્મ મારફતે પારદર્શક પદ્ધતિનો ઉપયોગ કરવો જરૃરી છે.
વધુમાં, કલેક્ટર કક્ષાના / જિલ્લા કક્ષાના એનઓસી મેળવવાની પ્રથા બંધ કરી જિલ્લા બદલીની અરજીઓનો જે તે વર્ષમાં નિકાલ કરવાની પ્રથા અમલમાં મુકવી. કારકુનથી નાયબ મામલતદારના પ્રમોશનની કાર્યવાહી હાલ ચાલુમાં છે. જેમાં હાલ ઉપલબ્ધ મહત્તમ જગ્યાઓ પર પ્રમોશન આપવામાં આવે અને વર્ષ ૨૦૧૫માં નિમણૂક પામેલ તમામ કારકુનોને એક સાથે પ્રમોશન આપવાની કાર્યવાહી કરવા માંગ કરી છે. આગામી ૧૦ દિવસમા હકારાત્મક નિકાલ કરવામાં નહી આવે તો જિલ્લામાં મહેસુલી કર્મચારીઓ દ્વારા કાળી પટ્ટી ધારણ કરવી, માસ સીએલ અને હડતાલ જેવા કાર્યક્રમો કરવામાં આવશેે.
