સનાતની સાધુઓ આરપારની લડાઇના મૂડમાં: મોરારિબાપુએ આપ્યું ચેતવણીજનક નિવેદન
આર્જેન્ટિનામાં મોરારિબાપુની પ્રતિક્રિયા:
સનાતન ધર્મ સામે અપશબ્દો વાપરનારા વિરુદ્ધ સનાતની સાધુ-સંતો હવે આરપારની લડાઇના મૂડમાં છે. આર્જેન્ટિનામાં કથા દરમિયાન મોરારિબાપુએ ચેતવણીભર્યું નિવેદન આપતાં કહ્યું, “હાથીના પગ નીચે કચડાઇ જજો, પણ સનાતન ધર્મના વિરોધીના દેવસ્થાનમાં ક્યારેય ન જજો.” તેમણે સંકેત આપ્યો કે હવે આ ક્ષમા કરવાનો સમય નથી.
સ્વામિનારાયણ સંપ્રદાયના કેટલાક સાધુઓના નિવેદનો બાદ વિવાદ:
ગત બે મહિનામાં સ્વામિનારાયણ સંપ્રદાયના કેટલાક સાધુઓએ ભગવાન શિવ, કૃષ્ણ અને અન્ય દેવી-દેવતાઓ અંગે નિવેદન આપ્યા હતા, જેનાથી વિવાદ સર્જાયો છે. મોરારિબાપુ ઉપરાંત ઇન્દ્રભારતીબાપુ અને મહેન્દ્રાનંદગીરીએ પણ આ મામલે કડક વલણ અપનાવ્યું છે અને જણાવ્યું છે કે હવે આ હદ પાર થઇ ગઇ છે, અને સનાતન વિરોધીઓને માફી નથી.
સનાતન સાધુઓનું તંત્રને પ્રશ્ન:
સનાતની સાધુ-સંતોએ પ્રશ્ન ઉઠાવ્યો છે કે બજારમાં વિવાદાસ્પદ ધાર્મિક પુસ્તકો અને ડોક્યુમેન્ટરીઝ ઉપલબ્ધ છે, જેમાં ભગવાન શિવ અને કૃષ્ણ અંગે અનાદર દર્શાવાયો છે. તેઓએ સવાલ કર્યો કે સરકારી તંત્ર આ મામલે શાંત શા માટે છે? 
કંઠીબંધ શિષ્યોને ઇન્દ્રભારતીબાપુનું આહ્વાન:
શ્રી પંચ દશનામ જૂના અખાડાના રાષ્ટ્રીય ઉપાધ્યક્ષ અને રુદ્રેશ્વર જાગીર ભારતી આશ્રમના મહંત ઇન્દ્રભારતીબાપુએ કંઠીબંધ શિષ્યોને સંબોધતાં કહ્યું કે, “સનાતન વિરોધીઓના મંદિરમાં ન જવાનો નિર્ણય લો અને મને ગુરુ દક્ષિણા આપો.” તેમણે સ્પષ્ટતા કરી કે તેઓ કોઇ સંપ્રદાયના વિરોધી નથી, પરંતુ સનાતન ધર્મ સામે અપમાનસૂચક ટિપ્પણીઓ બરદાશ્ત કરવી અશક્ય છે.
જગદ્ગુરુ ગર્ગાચાર્ય પીઠાધીશ્વર મહેન્દ્રાનંદગીરીનું નિવેદન:
જગદ્ગુરુ ગર્ગાચાર્ય પીઠાધીશ્વર મહેન્દ્રાનંદગીરીએ પણ ભક્તોને આહ્વાન કર્યું છે કે, “સનાતન ધર્મ વિરુદ્ધની ટિપ્પણી કરનારા લોકોના દેવસ્થાનમાં ન જવું અને તેમના સાથે કોઇ સંપર્ક કે સંબંધ ન રાખવો.”
સનાતન ધર્મ માટે ઊભી થયેલી આ ચિંતાઓને લઇને દેશભરમાં ચર્ચા શરૂ થઇ છે. હવે જોવાનું રહેશે કે આ મુદ્દે તંત્ર અને ધર્મગુરૂઓની આગામી ભવિષ્યવાણી કેવી રહેશે.
