આણંદ જિલ્લામાં હોલસેલર્સ, રિટેલર્સ અને પ્રોસેસર્સ માટે સ્ટોક રજીસ્ટ્રેશન ફરજિયાત
ઘઉંની સંગ્રહખોરી અટકાવવા માટે ભારત સરકારે સ્ટોક મર્યાદા નક્કી કરી છે, જે હોલસેલર્સ, રિટેલર્સ, મોટા ચેઈન રિટેલર્સ, મિલર્સ, આયાતકારો અને પ્રોસેસર્સ પર લાગુ પડે છે. આ અનુસંધાનમાં, આણંદ જિલ્લામાં પુરવઠા વિભાગ દ્વારા વિશેષ તપાસ હાથ ધરવામાં આવી.
જિલ્લા કલેક્ટર પ્રવીણ ચૌધરીના માર્ગદર્શન હેઠળ, આણંદ જિલ્લાના પુરવઠા વિભાગે 08 ટીમોની રચના કરી અને ઘઉંના વેપારીઓની આકસ્મિક ચકાસણી કરી. જિલ્લા પુરવઠા અધિકારી જે.એસ. પટેલની ઉપસ્થિતિમાં, કરમસદ ખાતેના એવન્યુ સુપર માર્ટ (ગેલેરિયા મોલની બાજુમાં) ખાતે ઘઉંના સ્ટોકની ચકાસણી હાથ ધરવામાં આવી. તપાસ દરમિયાન, ફિઝિકલ સ્ટોક અને ઓનલાઈન નોંધાયેલ સ્ટોક વચ્ચે કોઈ તફાવત જોવા મળ્યો નથી, જે સૂચવે છે કે સ્ટોકનો સાચો હિસાબ રાખવામાં આવ્યો છે.
તાલુકા કક્ષાની 08 ટીમો દ્વારા આણંદ જિલ્લાના તમામ તાલુકાઓમાં 34 જેટલા ઘઉંના હોલસેલર્સ, રિટેલર્સ, મોટા ચેઈન રિટેલર્સ, મિલર્સ, આયાતકારો અને પ્રોસેસર્સની આકસ્મિક ચકાસણી હાથ ધરાઈ. તમામ હોલસેલર્સ અને વેપારીઓ દ્વારા જાહેર કરાયેલા સ્ટોક અને ફિઝિકલ વેરિફિકેશનમાં કોઈ વિસંગતતા જણાઈ નથી, જેનો અર્થ એ છે કે તેઓ સરકારે નક્કી કરેલી મર્યાદાનું પાલન કરી રહ્યા છે. 
સ્ટોક મર્યાદા:
હોલસેલર્સ: 250 મેટ્રિક ટન
રિટેલર્સ: દરેક રિટેલ આઉટલેટ માટે 04 મેટ્રિક ટન
મોટા ચેઈન રિટેલર્સ: દરેક વિષય માટે 04 મેટ્રિક ટન મહત્તમ, જે તમામ આઉટલેટ્સ અને ડેપો માટે લાગુ પડશે
પ્રોસેસર્સ: માસિક સ્થાપિત ક્ષમતા નું 50% (એપ્રિલ 2025 સુધી)
જિલ્લા પુરવઠા અધિકારી જે.એસ. પટેલે આણંદ જિલ્લાના હોલસેલર્સ, રિટેલર્સ, મોટા ચેઈન રિટેલર્સ, મિલર્સ, આયાતકારો અને પ્રોસેસર્સને ભારત સરકારના પોર્ટલ પર રજીસ્ટ્રેશન કરાવવા અને દર શુક્રવારે સ્ટોકની વિગતો દાખલ કરવા અનુરોધ કર્યો છે.
તેમણે વધુમાં જણાવ્યું કે, “આ તપાસણીઓ આગામી દિવસોમાં પણ ચાલુ રહેશે અને જો કોઈ વેપારી સ્ટોક મર્યાદા ભંગ કરશે, તો તેમના પર યોગ્ય કાયદેસર કાર્યવાહી કરવામાં આવશે.”
