ભરવાડ સમાજના આસ્થા કેન્દ્ર નગાલાખા બાપાના ધામમાં ભવ્ય મહોત્સવ, 75,000 બહેનોનો વર્લ્ડ રેકોર્ડ
બાવળિયાળી, ધોલેરા – ભરવાડ સમાજ માટે શ્રદ્ધા અને ભક્તિનું કેન્દ્ર ગણાતા બાવળિયાળી સ્થિત નગાલાખા બાપાના ધામમાં નિજમંદિરને પોણા ચારસો વર્ષ પૂર્ણ થવા નિમિત્તે ભવ્ય પુનઃ પ્રાણપ્રતિષ્ઠા મહોત્સવ અને શ્રીમદ્ ભાગવત સપ્તાહનું આયોજન થયું. આ પવિત્ર પ્રસંગે ગુજરાતના મુખ્યમંત્રી ભૂપેન્દ્ર પટેલ ખાસ ઉપસ્થિત રહ્યા હતા.
75,000 બહેનોએ ગોપી હુડા મહારાસ સાથે સર્જ્યો વર્લ્ડ રેકોર્ડ 
આ મહોત્સવમાં ભરવાડ સમાજની 75,000 બહેનો દ્વારા પરંપરાગત ગોપી હુડા મહારાસ યોજાયો, જેનાથી વર્લ્ડ રેકોર્ડ ઓફ ઇન્ડિયા દ્વારા તેને વૈશ્વિક સ્તરે માન્યતા મળી. ગુજરાત અને મહારાષ્ટ્રની મહિલાઓના વિશાળ સમૂહે એકસાથે ગોપી હુડા મહારાસની પ્રસ્તુતિ આપીને ભક્તિ અને પરંપરાની અનોખી છાપ છોડી.
મહોત્સવમાં લાખો ભક્તો અને મહંતો ઉપસ્થિત
આ ભવ્ય આયોજનમાં 2 લાખથી વધુ ભક્તજનો, સંતો, મહંતો અને સમાજના અગ્રણીઓની ઉપસ્થિતિ રહી. વિવિધ ધાર્મિક અને સાંસ્કૃતિક કાર્યક્રમો દરરોજ યોજાયા.
મહંત શ્રી રામબાપુને વર્લ્ડ રેકોર્ડ પ્રમાણપત્ર એનાયત
વિશ્વ વિક્રમની નોંધ વર્લ્ડ રેકોર્ડ ઓફ ઇન્ડિયા જીનિયસ ફાઉન્ડેશનના CEO પાવન સોલંકીના હસ્તે મહંત શ્રી રામબાપુને પ્રમાણપત્ર એનાયત કરવામાં આવ્યું.
આ ભવ્ય કાર્યક્રમથી ધોલેરા તાલુકાનું બાવળિયાળી ઠાકરધામ સમસ્ત સમાજ માટે ભક્તિ અને સંસ્કૃતિનું મહત્ત્વનું કેન્દ્ર બન્યું છે.
