નવા સબ સ્ટેશનથી બોરસદ તાલુકાના 14 ગામોને મળશે 24 કલાક વીજ પુરવઠો
ગુજરાત એનર્જી ટ્રાન્સમિશન કોર્પોરેશન લિમિટેડ(જેટકો) હસ્તકના આણંદ જિલ્લાના બોરસદ તાલુકાના કાલુ ગામ ખાતેના 66 કે.વી. સબ સ્ટેશનનું ખાતમુહૂર્ત નાયબ મુખ્ય દંડક રમણભાઈ સોલંકીએ કર્યું હતું.
આ પ્રસંગે નાયબ દંડક રમણભાઈ સોલંકીએ જણાવ્યું હતું કે, અંદાજિત 12.50 કરોડના ખર્ચે નિર્માણ થનાર સબ સ્ટેશન થકી બોરસદ તાલુકાના કાલુ ગામ સહિત આજુબાજુના અન્ય 14 ગામના 15 હજાર ઉપરાંત લાભાર્થીઓને 24 કલાક વીજ પુરવઠો મળી રહેશે, તેમ તેમણે વિશ્વાસપૂર્વક જણાવ્યું હતું.
વધુમાં તેમણે ઉમેરતા જણાવ્યું હતું કે, મુખ્યમંત્રી ભૂપેન્દ્રભાઈ પટેલના નેતૃત્વમાં રાજયના દરેક નાગરિકોને માળખાકીય સુવિધા મળી રહે તે માટે કટીબધ્ધ છે,જેના પરિણામે બોરસદ તાલુકાના કાલુ ગામનું સબસ્ટેશનનું નિમાર્ણ પામનાર છે. 
આ વેળાએ નાયબ મુખ્ય દંડક એ ઉર્જા મંત્રી કનુભાઈ દેસાઈનો આભાર વ્યક્ત કરતાં કહ્યું હતું કે, ટુંક જ સમયમાં ઉર્જા મંત્રીએ આ પ્રકારના સબસ્ટેશનની મંજૂરી આપી,જેથી કરીને વીજળીની સમસ્યા દૂર થશે અને લોકોના જીવનમાં પણ અજવાળું પથરાશે, તેમ તેમણે ભારપૂર્વક જણાવ્યું હતું.આ વેળાએ બોરસદ તાલુકા પંચાયત પ્રમુખ મિહિરભાઈ પટેલે પ્રાસંગિક ઉદબોધન કરીને કાલુ ગામના સરપંચ તથા ગામજનોનો સહકાર આપવા બદલ આભાર વ્યક્ત કર્યો હતો.
