સોજિત્રા નગરપાલિકાની સામાન્ય સભા પ્રમુખ રીંકુબેન પટેલ અને ચીફ ઓફિસર પાર્થ પરમારના અધ્યક્ષસ્થાને નગરપાલિકાના સભાખંડમાં યોજાઈ હતી. આ બેઠકમાં ભાજપના 13 અને વિપક્ષના 9 સભ્યો સહિત કુલ 22 સભ્યો ઉપસ્થિત રહ્યા હતા.
સભામાં ગત સામાન્ય સભાના ઠરાવોને બહાલી આપવા ઉપરાંત શહેરના વહીવટી તંત્ર અને વિકાસલક્ષી કામગીરીને લગતા વિવિધ મુદ્દાઓ પર ચર્ચા કરવામાં આવી હતી. એજન્ડામાં રજૂ કરાયેલા તમામ સાત કામોને બહુમતીથી મંજૂરી આપવામાં આવી હતી.
બેઠકનું સૌથી મહત્ત્વપૂર્ણ આકર્ષણ નગરપાલિકાના કર્મચારીઓ માટે જીવન વીમો ઉતારવાનો નિર્ણય રહ્યો હતો. આ યોજનાનો લાભ નગરપાલિકામાં ફરજ બજાવતા કાયમી કર્મચારીઓની સાથે રોજમદાર કર્મચારીઓને પણ મળશે. કર્મચારીઓના હિત અને સામાજિક સુરક્ષાને ધ્યાનમાં રાખીને લેવાયેલા આ નિર્ણયને આવકારવામાં આવી રહ્યો છે.
આ ઉપરાંત નગરપાલિકાના વેરા દફતરમાં આવેલી નવી આકારણી તેમજ મિલકતોના નામ ટ્રાન્સફર કરવા સંબંધિત અરજીઓ પર ચર્ચા કરી જરૂરી નિર્ણયો લેવામાં આવ્યા હતા. વિવિધ બિલોની ચૂકવણીને પણ મંજૂરી આપવામાં આવી હતી.
સભામાં નગરપાલિકાના ત્રિમાસિક હિસાબો અને ખર્ચની વિગતોને બહાલી આપવા સહિત શહેરના વિકાસ માટે વિવિધ ગ્રાન્ટ અંતર્ગત હાથ ધરાનારા કામોની દરખાસ્તો પણ મંજૂર કરવામાં આવી હતી.
આમ, સામાન્ય સભામાં તમામ સાત દરખાસ્તોને બહુમતીથી મંજૂરી મળતાં આગામી સમયમાં સોજિત્રા શહેરમાં વહીવટી અને વિકાસલક્ષી કામગીરીને નવી ગતિ મળવાની શક્યતા છે. ખાસ કરીને કર્મચારીઓ માટે જીવન વીમાની સુવિધા ઊભી કરવાનો નિર્ણય આ બેઠકનો મહત્ત્વનો નિર્ણય બની રહ્યો છે.