દેશમાં મોંઘવારી અને ઊંચા વ્યાજદરનો માહોલ હોવા છતાં ઓક્ટોબર મહિનામાં ભારતીય બજારમાં ખરીદીનો જોરદાર ઉત્સાહ જોવા મળ્યો છે. દિવાળી સહિતના તહેવારોની સિઝન દરમિયાન લોકોએ છૂટા હાથે ખર્ચ કર્યો હતો. તેની અસર દેશના આર્થિક આંકડાઓમાં પણ સ્પષ્ટ જોવા મળી રહી છે. GST કલેક્શન, કારનું વેચાણ, ડિજિટલ પેમેન્ટ અને વીજળીના વપરાશમાં નોંધપાત્ર વધારો થયો છે. આ આંકડાઓ દર્શાવે છે કે વૈશ્વિક તણાવ અને મોંઘવારીની ચિંતાઓ વચ્ચે પણ દેશના ગ્રાહકોએ ખરીદીમાં રસ દાખવ્યો છે.
GST કલેક્શનમાં 22.9 ટકાનો મોટો ઉછાળો
ઓક્ટોબર મહિનામાં દેશનું GST કલેક્શન વાર્ષિક ધોરણે 22.9 ટકા વધીને રૂ. 2.31 લાખ કરોડ પર પહોંચી ગયું છે. ગયા વર્ષે ઓક્ટોબરમાં આ આંકડો આશરે રૂ. 1.88 લાખ કરોડ હતો. GST કલેક્શનમાં થયેલો આ વધારો તહેવારો દરમિયાન બજારમાં થયેલી મોટા પાયાની ખરીદી અને વેપારી પ્રવૃત્તિઓમાં આવેલી તેજીનો સંકેત આપે છે.
એક મહિનામાં રેકોર્ડબ્રેક કારનું વેચાણ
ઓટોમોબાઇલ સેક્ટર માટે પણ ઓક્ટોબર મહિનો શાનદાર રહ્યો છે. દેશમાં એક જ મહિનામાં અંદાજે 5.25થી 5.30 લાખ કારનું વેચાણ નોંધાયું છે. ગયા વર્ષે ઓક્ટોબરમાં આશરે 4.65 લાખ કાર વેચાઈ હતી. એટલે કે આ વર્ષે કારના વેચાણમાં 13થી 14 ટકાનો વધારો થયો છે.
માત્ર પેટ્રોલ-ડીઝલ કાર જ નહીં, પરંતુ ઇલેક્ટ્રિક વાહનોની માંગમાં પણ મોટો ઉછાળો જોવા મળ્યો છે. ઓક્ટોબરમાં 2.24 લાખ ઇલેક્ટ્રિક ટૂ-વ્હીલરનું વેચાણ થયું છે. વાહન પોર્ટલના આંકડા અનુસાર, ઇલેક્ટ્રિક દ્વિચક્રી વાહનોના વેચાણનો આ અત્યાર સુધીનો સૌથી મોટો માસિક આંકડો છે.
UPI પેમેન્ટમાં પણ નવો રેકોર્ડ
ડિજિટલ ઇન્ડિયાની અસર હવે રોજિંદા વ્યવહારોમાં પણ જોવા મળી રહી છે. ઓક્ટોબર મહિનામાં UPI દ્વારા કુલ 25.47 અબજ એટલે કે 2,547 કરોડ ટ્રાન્ઝેક્શન નોંધાયા હતા. ગયા વર્ષની સરખામણીએ તેમાં 23 ટકાનો વધારો થયો છે.
આ તમામ વ્યવહારોનું કુલ મૂલ્ય રૂ. 31.53 લાખ કરોડ સુધી પહોંચ્યું છે, જે વાર્ષિક ધોરણે 16 ટકા વધારે છે. ખાસ વાત એ છે કે પ્રથમ વખત UPI મારફતે દરરોજ સરેરાશ રૂ. 1 લાખ કરોડના વ્યવહારો થયા છે. આ આંકડો દેશમાં ડિજિટલ પેમેન્ટના વધતા ઉપયોગને દર્શાવે છે.
વીજળીના વપરાશમાં 22 ટકાનો વધારો
દેશમાં આર્થિક અને ઔદ્યોગિક પ્રવૃત્તિઓ વધવાની અસર વીજળીના વપરાશમાં પણ જોવા મળી છે. ઓક્ટોબરમાં વીજળીનો વપરાશ ગયા વર્ષની સરખામણીએ લગભગ 22 ટકા વધીને 160 અબજ યુનિટ નોંધાયો હતો. આ ઉપરાંત ડીઝલના વેચાણમાં પણ 11.7 ટકાનો વધારો થયો છે.
તહેવારોની સિઝને બજારમાં ભરી નવી રોનક
એકંદરે ઓક્ટોબરના આંકડાઓ દર્શાવે છે કે તહેવારોની સિઝન દરમિયાન દેશના બજારમાં ખરીદીનો માહોલ મજબૂત રહ્યો હતો. વાહનોની ખરીદી હોય, ડિજિટલ પેમેન્ટ હોય કે વીજળી અને ઇંધણની માંગ, દરેક ક્ષેત્રમાં વૃદ્ધિ જોવા મળી છે. મોંઘવારી અને વૈશ્વિક અનિશ્ચિતતાઓ વચ્ચે પણ ભારતીય ગ્રાહકોએ તહેવારોની ખરીદીમાં ઉત્સાહ બતાવ્યો છે. આ તેજી દેશની આર્થિક ગતિવિધિઓ માટે સકારાત્મક સંકેત માનવામાં આવી રહી છે.