આણંદ જિલ્લાની ઉમરેઠ વિધાનસભા બેઠકની પેટાચૂંટણીને લઈને રાજકીય માહોલ ગરમાયો છે. આજે ભાજપના ઉમેદવાર હર્ષદભાઈ પરમારે પોતાની ઉમેદવારી નોંધાવી હતી. ઉમેદવારી નોંધાવ્યા બાદ યોજાયેલ જનસભામાં મોટી સંખ્યામાં ઉમરેઠના નાગરિકો ઉપસ્થિત રહ્યા હતા અને વિજય સંકલ્પ સાથે જનતા સાથે સંવાદ સાધવામાં આવ્યો હતો.
આ પ્રસંગે ઉમરેઠના પૂર્વ ધારાસભ્ય સ્વ. ગોવિંદભાઈ પરમારને ભાવપૂર્ણ શ્રદ્ધાંજલિ અર્પણ કરવામાં આવી હતી. સ્વ. ગોવિંદભાઈ પરમારે પોતાના કાર્યકાળ દરમિયાન વિસ્તારના વિકાસ માટે મહત્વપૂર્ણ યોગદાન આપ્યું હતું અને લોકો સાથે આત્મીય સંબંધ કેળવીને જનસેવાનું ઉત્તમ ઉદાહરણ પૂરું પાડ્યું હતું.
જનસભામાં જણાવ્યું હતું કે માનનીય વડાપ્રધાન નરેન્દ્રભાઈ મોદીના નેતૃત્વમાં ભારતીય જનતા પાર્ટીએ હંમેશા વિકાસની રાજનીતિને પ્રાધાન્ય આપ્યું છે. સામાન્ય અને છેવાડાના માણસ સુધી સરકારની જનકલ્યાણકારી યોજનાઓ પહોંચાડીને લોકોનો વિશ્વાસ જીતવામાં સફળતા મેળવી છે.
આ સાથે ઉમરેઠના નાગરિકોને અપીલ કરવામાં આવી કે તેઓ મોટી સંખ્યામાં મતદાન કરીને ભાજપના ઉમેદવાર હર્ષદભાઈ પરમારને જંગી બહુમતીથી વિજયી બનાવે.
ઉમરેઠ પેટાચૂંટણીને લઈને રાજકીય ગતિવિધિઓ તેજ બની રહી છે અને આગામી દિવસોમાં ચૂંટણી પ્રચાર વધુ તેજ બનવાની શક્યતા છે.
