આગામી સ્થાનિક સ્વરાજ્યની ચૂંટણીઓને ધ્યાનમાં રાખીને ભારતીય જનતા પાર્ટી (BJP) સક્રિય બની છે. આ વખતે ઉમેદવારોની પસંદગી માટે પક્ષ દ્વારા નવી માર્ગદર્શિકા બનાવવાનો નિર્ણય લેવામાં આવ્યો છે, જેના કારણે ઘણા જૂના નેતાઓને ટિકિટ ન મળવાની શક્યતા છે.
સૂત્રોના જણાવ્યા અનુસાર, 60 વર્ષથી વધુ ઉંમરના નેતાઓને ટિકિટ નહીં આપવામાં આવે. ઉપરાંત સતત ત્રણ ટર્મ સુધી ચૂંટણી લડનાર અથવા જીતનાર આગેવાનોને પણ આ વખતે આરામ આપવામાં આવી શકે છે. પક્ષ એન્ટી-ઈન્કમ્બન્સી ઘટાડવા અને નવા યુવા ચહેરાઓને તક આપવા માટે ‘નો-રિપીટ’ થિયરી લાગુ કરવાની તૈયારીમાં છે.
ભાજપે ઉમેદવારી માટે ઓછામાં ઓછી 9 વર્ષથી પક્ષમાં સક્રિય સભ્ય હોવાની શરત પણ રાખી છે. સાથે જ સંગઠનમાં પ્રમુખ અથવા મહામંત્રી જેવા મહત્વના હોદ્દા પર રહેલા નેતાઓને કોર્પોરેશન ચૂંટણી લડવા માટે ટિકિટ આપવામાં નહીં આવે. આ નિયમો લાગુ પડશે તો ઘણા જૂના કાઉન્સિલરો અને નેતાઓના પત્તા કપાવાની શક્યતા છે.
