ગાંધીનગર: ગુજરાતમાં ઉનાળો હવે તેના અસલ મિજાજમાં જોવા મળી રહ્યો છે. આકાશમાંથી વરસી રહેલી અગનજ્વાળાઓને કારણે રાજ્યના મોટાભાગના શહેરોમાં તાપમાનનો પારો 40 ડિગ્રીને વટાવી ગયો છે. ખાસ કરીને સૌરાષ્ટ્રમાં કાળઝાળ ગરમીનો પ્રકોપ શરૂ થયો છે, જેમાં 42.7 ડિગ્રી સાથે રાજકોટ 'હોટ સિટી' બન્યું છે.
અંબાલાલ પટેલની ગંભીર આગાહી: 44 ડિગ્રી સુધી પહોંચશે પારો
હવામાન નિષ્ણાંત અંબાલાલ પટેલે રાજ્યમાં ગરમીને લઈ ચિંતાજનક આગાહી કરી છે. તેમના જણાવ્યા અનુસાર:
28 એપ્રિલ સુધી રાજ્યમાં ભીષણ ગરમી પડશે.
તાપમાનનો પારો 42થી 44 ડિગ્રી સુધી પહોંચવાની પૂરેપૂરી શક્યતા છે.
કચ્છ અને સૌરાષ્ટ્રમાં ગરમીનો સૌથી વધુ પ્રભાવ જોવા મળશે.
દક્ષિણ ગુજરાતમાં ભેજવાળા પવનોને કારણે અસહ્ય ઉકળાટ રહેશે.
સૌરાષ્ટ્રમાં ગરમીએ માઝા મૂકી છે. રાજકોટમાં પારો 42.7 ડિગ્રીએ પહોંચતા મ્યુનિસિપલ કોર્પોરેશન દ્વારા 'યલો એલર્ટ' જાહેર કરવામાં આવ્યું છે. અમરેલીમાં 42.5 ડિગ્રી અને સુરેન્દ્રનગરમાં 42.1 ડિગ્રી તાપમાન નોંધાયું છે. બીજી તરફ અમદાવાદમાં પણ પારો 41.5 ડિગ્રીએ પહોંચતા લોકો અકળાઈ ઉઠ્યા છે. હવામાન વિભાગના મતે આગામી ત્રણ દિવસમાં અમદાવાદના તાપમાનમાં હજુ 3 ડિગ્રીનો વધારો થઈ શકે છે.
અંબાલાલ પટેલે વધુમાં જણાવ્યું છે કે 28 એપ્રિલ સુધી આકરી ગરમી પડ્યા બાદ હવામાનમાં પલટો આવી શકે છે. રાજ્યના કેટલાક વિસ્તારોમાં પ્રિ-મોન્સૂન એક્ટિવિટીના ભાગરૂપે વરસાદ અને કરા પણ પડી શકે છે. જોકે, ત્યાં સુધી દરિયાકાંઠાના વિસ્તારોમાં રહેતા લોકોએ ઉકળાટ અને બફારાનો સામનો કરવો પડશે.
