વડાપ્રધાન નરેન્દ્ર મોદી 31મી માર્ચે ગુજરાતની એક દિવસીય મુલાકાતે આવી રહ્યા છે, જેમાં તેઓ ગાંધીનગરના કોબા, અમદાવાદના સાણંદ અને બનાસકાંઠાના ડીસા ખાતે વિવિધ વિકાસ કાર્યોનું લોકાર્પણ અને શિલાન્યાસ કરશે. આ મુલાકાત દરમિયાન ત્રણેય સ્થળોએ તેઓ જાહેરસભાઓને સંબોધિત પણ કરશે.
કોબા ખાતે વડાપ્રધાન સમ્રાટ સંપ્રતિ સંગ્રહાલયનું લોકાર્પણ કરશે, જે જૈન મુનિ પદ્મસાગર સૂરીશ્વર મહારાજની પ્રેરણાથી તૈયાર કરવામાં આવ્યું છે. આ સંગ્રહાલયમાં જૈન સંસ્કૃતિ અને ઇતિહાસ સાથે જોડાયેલા દુર્લભ સંગ્રહો પ્રદર્શિત કરવામાં આવ્યા છે અને આ પ્રસંગે મોટી સંખ્યામાં ભક્તો હાજર રહેશે.
સાણંદ ખાતે વડાપ્રધાન કેયન્સ સેમિકોન પ્લાન્ટનું ઉદ્ઘાટન કરશે, જે ₹3,300 કરોડના રોકાણથી તૈયાર થયું છે અને દરરોજ લાખો ચિપ્સનું ઉત્પાદન કરવાની ક્ષમતા ધરાવે છે. ત્યારબાદ ડીસા ખાતે તેઓ ₹25,000 કરોડથી વધુના વિકાસ પ્રોજેક્ટ્સનું લોકાર્પણ અને શિલાન્યાસ કરશે, જે ઉત્તર ગુજરાતના વિકાસ માટે મહત્વપૂર્ણ માનવામાં આવે છે.
