બોલિવૂડમાં ફિલ્મોની સફળતાને લઈને ચાલી રહેલી ચર્ચા વચ્ચે ફિલ્મમેકર ઇમ્તિયાઝ અલીએ રણવીર સિંહની ફિલ્મ ફ્રેન્ચાઇઝ 'ધુરંધર'ના ભરપૂર વખાણ કર્યા છે. તેમના મતે, આ ફિલ્મે હિન્દી ફિલ્મ ઇન્ડસ્ટ્રીની જૂની માન્યતાઓને પડકાર ફેંક્યો છે અને ફિલ્મમેકર્સને પોતાની વિચારસરણી બદલવા મજબૂર કર્યા છે.
હિન્દુસ્તાન ટાઇમ્સ સમિટ દરમિયાન વાતચીત કરતાં ઇમ્તિયાઝ અલીએ જણાવ્યું હતું કે શરૂઆતમાં 'ધુરંધર'નો વિચાર અનેક લોકોને અવ્યવહારુ લાગતો હતો. સ્ટુડિયોઝને પણ આ ફિલ્મ સફળ થશે કે નહીં તે અંગે શંકા હતી. જોકે, ફિલ્મની સફળતાએ તમામ અંદાજો ખોટા સાબિત કર્યા.
આદિત્ય ધરના નિર્દેશનમાં બનેલી આ સ્પાય થ્રિલર ફ્રેન્ચાઇઝના બંને ભાગોએ બોક્સ ઓફિસ પર જોરદાર કમાણી કરી છે. ફિલ્મની સફળતાએ સાબિત કર્યું છે કે દર્શકોને લાંબી ફિલ્મો પણ પસંદ આવી શકે છે, જો તેની વાર્તા અને રજૂઆત અસરકારક હોય.
ત્રણ કલાકની ફિલ્મ પણ દર્શકોને થિયેટર સુધી ખેંચી શકે છે
ઇમ્તિયાઝ અલીએ બોલિવૂડના બદલાતા માહોલ અંગે વાત કરતાં કહ્યું કે હાલમાં ફિલ્મમેકર્સ સામે સૌથી મોટો પડકાર દર્શકોની પસંદગી સમજવાનો છે. ઇન્ડસ્ટ્રીમાં એવી ચર્ચા ચાલી રહી છે કે મોટા સ્ટાર્સની ફિલ્મો પણ સફળ થતી નથી અને સ્ટાર વગરની ફિલ્મો માટે પણ દર્શકોને થિયેટર સુધી લાવવા મુશ્કેલ બની રહ્યું છે.
આ ઉપરાંત દર્શકોનું અટેન્શન સ્પૅન ઘટી રહ્યું હોવાની દલીલ સાથે લાંબી ફિલ્મો ન બનાવવાની સલાહ પણ આપવામાં આવે છે. જોકે, ઇમ્તિયાઝના મતે 'ધુરંધર'એ આ માન્યતાને ખોટી સાબિત કરી છે.
તેમણે જણાવ્યું હતું કે ત્રણ કલાક જેટલી લાંબી ફિલ્મ હોવા છતાં 'ધુરંધર'ને દર્શકોનો જબરદસ્ત પ્રતિસાદ મળ્યો છે. આ ફિલ્મની સફળતા ઇન્ડસ્ટ્રી માટે એક મહત્ત્વપૂર્ણ સંકેત છે કે ફિલ્મની લંબાઈ કરતાં તેની વાર્તા અને દર્શકો સાથેનું જોડાણ વધારે મહત્ત્વ ધરાવે છે.
શરૂઆતમાં સ્ટુડિયોઝને ફિલ્મના સફળ થવાની આશા નહોતી
ઇમ્તિયાઝ અલીએ 'ધુરંધર'ની શરૂઆતના દિવસોનો ઉલ્લેખ કરતાં કહ્યું કે જ્યારે આ ફિલ્મનો વિચાર લઈને નિર્માતાઓ અલગ-અલગ સ્ટુડિયોઝ પાસે ગયા હતા, ત્યારે અનેક લોકોને આ પ્રોજેક્ટની સફળતા અંગે શંકા હતી.
તેમના જણાવ્યા અનુસાર, તે સમયે આ ફિલ્મને સૌથી ઓછા સફળતાની શક્યતા ધરાવતા પ્રોજેક્ટ્સમાં ગણવામાં આવતી હતી. પરંતુ ફિલ્મ રિલીઝ થયા બાદ મળેલા પ્રતિસાદે તમામ સમીકરણો બદલી નાખ્યાં.
ઇમ્તિયાઝે કહ્યું કે ફિલ્મે ઇન્ડસ્ટ્રીના સ્થાપિત નિયમોને પડકાર્યા છે. હવે જે ફિલ્મને શરૂઆતમાં જોખમી માનવામાં આવતી હતી, તેવી જ ફિલ્મો બનાવવાની ઇચ્છા અનેક લોકોમાં જોવા મળી રહી છે.
તેમણે વધુમાં જણાવ્યું કે ભાષા અને ફિલ્મ બનાવવાની પદ્ધતિ ભલે અલગ હોય, પરંતુ સમગ્ર ફિલ્મ ઇન્ડસ્ટ્રી અત્યારે પોતાની જૂની વિચારસરણીનું આત્મમંથન કરી રહી છે.
બંને ભાગોએ વિશ્વભરમાં 3,100 કરોડથી વધુની કમાણી કરી
બોક્સ ઓફિસના આંકડા અનુસાર, વર્ષ 2025માં રિલીઝ થયેલા 'ધુરંધર'ના પ્રથમ ભાગને દેશ-વિદેશમાં શાનદાર પ્રતિસાદ મળ્યો હતો. ફિલ્મે ભારતમાં આશરે 840.20 કરોડ રૂપિયાનું નેટ કલેક્શન કર્યું હતું, જ્યારે વિશ્વભરમાં તેની ગ્રોસ કમાણી 1,307.35 કરોડ રૂપિયા રહી હતી.
ત્યારબાદ રિલીઝ થયેલા બીજા ભાગ 'ધુરંધર 2'એ પણ બોક્સ ઓફિસ પર જોરદાર પ્રદર્શન કર્યું હતું. મિશ્ર પ્રતિસાદ છતાં ફિલ્મે ભારતમાં આશરે 1,149.30 કરોડ રૂપિયાનું નેટ કલેક્શન કર્યું હતું. જ્યારે વિશ્વભરમાં તેની ગ્રોસ કમાણી 1,813.39 કરોડ રૂપિયા સુધી પહોંચી હતી.
આ રીતે બંને ફિલ્મોની વિશ્વવ્યાપી ગ્રોસ કમાણી 3,100 કરોડ રૂપિયાથી વધુ થઈ છે. આ સફળતાએ 'ધુરંધર' ફ્રેન્ચાઇઝને ભારતીય સિનેમાની સૌથી ચર્ચિત અને સફળ ફિલ્મ શ્રેણીઓમાં સ્થાન અપાવ્યું છે.
પાકિસ્તાનમાં ભારતીય ગુપ્તચર એજન્ટની ઘૂસણખોરીની કહાની
આદિત્ય ધર દ્વારા લખાયેલી અને દિગ્દર્શિત 'ધુરંધર' એક જાસૂસી અને એક્શન થ્રિલર ફિલ્મ છે. ફિલ્મની વાર્તામાં ભારતીય ગુપ્તચર એજન્ટની સફર દર્શાવવામાં આવી છે, જે પાકિસ્તાનમાં પ્રવેશીને ત્યાંના અપરાધ જગત અને આતંકવાદી નેટવર્કમાં ઘૂસણખોરી કરે છે.
ફિલ્મમાં રણવીર સિંહે મુખ્ય ભૂમિકા ભજવી છે. તેમની સાથે આર. માધવન, અક્ષય ખન્ના, અર્જુન રામપાલ, સંજય દત્ત, રાકેશ બેદી અને સારા અર્જુન સહિતના કલાકારો પણ મહત્ત્વપૂર્ણ ભૂમિકામાં જોવા મળ્યા છે.
ફિલ્મની એક્શન, જાસૂસીની કહાની, કલાકારોના અભિનય અને મોટા પાયે થયેલા નિર્માણને કારણે તેને દર્શકો તરફથી નોંધપાત્ર પ્રતિસાદ મળ્યો છે.
ઇમ્તિયાઝ અલીની આ ટિપ્પણી એવા સમયે સામે આવી છે જ્યારે બોલિવૂડમાં ફિલ્મોની સફળતાના જૂના માપદંડો અને દર્શકોની બદલાતી પસંદગીને લઈને નવી ચર્ચા શરૂ થઈ છે. 'ધુરંધર'ની સફળતાએ ફરી એકવાર સાબિત કર્યું છે કે મજબૂત વાર્તા અને અસરકારક રજૂઆત હોય તો ફિલ્મની લંબાઈ કે પરંપરાગત ફોર્મ્યુલા તેની સફળતામાં અવરોધ બનતા નથી.