વેબ સિરીઝ 'પંચાયત'માં પોતાના અભિનયથી લોકપ્રિયતા મેળવનાર અભિનેતા આસિફ ખાનની 'બિગ બોસ 20'ની સફરનો અંત આવ્યો છે. શોમાં લગભગ આઠ અઠવાડિયા રહ્યા બાદ આસિફ ઘરની બહાર થયો છે. બહાર આવ્યા બાદ તેણે એક ઇન્ટરવ્યૂમાં શોના અનુભવ, સ્પર્ધકો સાથેના મતભેદ અને પોતાના અંગત જીવન સાથે જોડાયેલી કેટલીક ભાવુક વાતો શેર કરી છે.
દિવ્ય ભાસ્કરને આપેલા ઇન્ટરવ્યૂમાં આસિફ પોતાના બાળપણના મિત્ર જૈદને યાદ કરીને ભાવુક થઈ ગયો હતો. તેણે ખુલાસો કર્યો કે જ્યારે તે બિગ બોસના ઘરમાં હતો, ત્યારે જ તેના મિત્રનું હાર્ટ એટેકના કારણે નિધન થયું હતું. જોકે, આ વાતની જાણ તેને શોમાંથી બહાર આવ્યા બાદ થઈ હતી.
હાર્ટ એટેકની બીમારીને લઈને શોમાં થયો હતો વિવાદ
આસિફને જુલાઈ 2025માં હાર્ટ એટેક આવ્યો હતો. શરૂઆતમાં તેણે આ તકલીફને એસિડ રિફ્લક્સની સમસ્યા સમજી હતી. બાદમાં તેની પત્ની ઝેબા ખાને મેડિકલ રિપોર્ટ શેર કરીને જણાવ્યું હતું કે આસિફની કોરોનરી આર્ટરીમાં બ્લોકેજ હતું અને સારવાર દરમિયાન તેના હૃદયમાં સ્ટેન્ટ મૂકવામાં આવ્યો હતો.
આસિફે પોતાની બીમારીની વાત જાહેરમાં ન કરી હોવાનું પણ જણાવ્યું હતું. તેને આશંકા હતી કે હાર્ટ એટેકની વાત બહાર આવવાથી ફિલ્મ ઇન્ડસ્ટ્રીમાં તેની છબી પર અસર પડી શકે છે અને ભવિષ્યમાં કામ મળવામાં મુશ્કેલી થઈ શકે છે.
બિગ બોસના ઘરમાં આ બીમારીને લઈને કો-કન્ટેસ્ટન્ટ કાઝી તૌકીર સાથે તેનો વિવાદ થયો હતો. આસિફે બીમારી જેવી ગંભીર બાબતને મજાકનો વિષય બનાવવામાં આવે તે સામે નારાજગી વ્યક્ત કરી હતી.
બીમારીની મજાકથી અન્ય દર્દીઓને પણ અસર થઈ શકે છે: આસિફ
આસિફના જણાવ્યા પ્રમાણે, ગંભીર બીમારીઓનો સામનો કરતા અનેક લોકો પોતાની તકલીફ વિશે ખુલ્લેઆમ વાત કરી શકતા નથી. આવી સ્થિતિમાં જો કોઈ બીમારીને મનોરંજન કે મજાકનો વિષય બનાવે તો તેનાથી ખરેખર બીમારીથી પીડિત લોકોની લાગણીઓને ઠેસ પહોંચી શકે છે.
તેણે કહ્યું કે આવી મજાકના કારણે ભવિષ્યમાં કોઈ વ્યક્તિ પોતાની બીમારી વિશે વાત કરે ત્યારે લોકો તેની વાતને ગંભીરતાથી લેવાને બદલે શંકા કરી શકે છે.
આસિફે વધુમાં જણાવ્યું કે ઘરમાં આ મુદ્દે ચર્ચા દરમિયાન તે ઘણી વખત ભાવુક થયો હતો અને રડ્યો પણ હતો. તેને અપેક્ષા હતી કે ઘરના સભ્યો તેની લાગણીઓને સમજશે. તેના મતે, કોઈ વ્યક્તિ મુશ્કેલીમાં હોય ત્યારે તેની વાત સાંભળવી અને માનવીય અભિગમ રાખવો સૌથી જરૂરી છે.
મિત્રના મોતના સમાચારથી તૂટી પડ્યો આસિફ
ઇન્ટરવ્યૂનો સૌથી ભાવુક પ્રસંગ ત્યારે આવ્યો જ્યારે આસિફે પોતાના બાળપણના મિત્ર જૈદના નિધન વિશે વાત કરી. આસિફે જણાવ્યું કે તે શોના પાંચમા અઠવાડિયામાં કેપ્ટન બન્યો હતો, તે જ દિવસે તેના મિત્રને ઘરે હાર્ટ એટેક આવ્યો હતો અને તેનું નિધન થયું હતું.
જૈદ અને આસિફની મિત્રતા LKG-UKGના સમયથી હતી. બંને બાળપણથી એકબીજાને ઓળખતા હતા. જોકે, શોમાં હોવાને કારણે આસિફને મિત્રના અંતિમ સમય દરમિયાન તેની પાસે રહેવાની તક મળી નહોતી.
ઘરની બહાર આવ્યા બાદ જ્યારે આસિફ પત્ની અને પરિવાર સાથે બેઠો હતો, ત્યારે તેણે શો દરમિયાન બહાર બનેલી ઘટનાઓ વિશે પૂછ્યું હતું. આ વાતચીત દરમિયાન પત્ની ઝેબાએ જૈદના મૃત્યુનો ઉલ્લેખ કર્યો હતો. આ સમાચાર સાંભળીને આસિફ અંદરથી તૂટી પડ્યો હતો.
તેણે કહ્યું કે મિત્રના મૃત્યુની જાણ થતાં તેને અફસોસ થયો કે જો તે શોમાં ન આવ્યો હોત તો કદાચ પોતાના મિત્રને છેલ્લી વખત મળી શક્યો હોત અને તેનો ચહેરો જોઈ શક્યો હોત.
પિતાને પણ હાર્ટ એટેકથી ગુમાવ્યા હતા
આસિફે જણાવ્યું કે તેના પિતાનું અવસાન પણ હાર્ટ એટેકના કારણે થયું હતું. આ કારણે હૃદયરોગ અને તેનાથી જોડાયેલી ઘટનાઓ તેના માટે અત્યંત અંગત અને ભાવનાત્મક મુદ્દા છે.
તેણે કહ્યું કે જ્યારે કોઈ વ્યક્તિ એવી બાબત પર અસંવેદનશીલ ટિપ્પણી કરે છે, જેની સાથે તે પોતે જીવનમાં જોડાયેલો હોય, ત્યારે તેને દુઃખ થવું સ્વાભાવિક છે. આવી સ્થિતિમાં તે પોતાની લાગણીઓ વ્યક્ત કરવાથી પાછળ હટતો નથી. જરૂર પડે તો પછીથી માફી માંગી શકે છે, પરંતુ તે સમયે પોતાની પ્રતિક્રિયા રોકવી તેના માટે મુશ્કેલ હોય છે.
આસિફની આ વાતો સામે આવ્યા બાદ બિગ બોસના ઘરની રમતથી આગળ વધીને સ્પર્ધકોની સંવેદનશીલતા અને વ્યક્તિગત લાગણીઓને સમજવાની જરૂરિયાત અંગે પણ ચર્ચા શરૂ થઈ છે.