અમેરિકામાં અમીર પરિવારોમાં વધુ બાળકો રાખવાનું ચલણ ઝડપથી ચર્ચામાં આવી રહ્યું છે. સામાન્ય રીતે મોંઘવારી અને બાળકોના ઉછેર પાછળ વધતા ખર્ચને કારણે મધ્યમ અને ઓછી આવક ધરાવતા પરિવારો બાળકોની સંખ્યા મર્યાદિત રાખવાનું પસંદ કરી રહ્યા છે. જોકે, દેશના સૌથી ધનિક પરિવારોમાં આ સ્થિતિથી વિપરીત ટ્રેન્ડ જોવા મળી રહ્યો છે. અહીં ત્રણ કે તેથી વધુ બાળકો ધરાવવું હવે માત્ર પરિવારની પસંદગી નહીં, પરંતુ પ્રતિષ્ઠાનું પ્રતીક પણ બની રહ્યું છે.
એક્સિઓસના અહેવાલ અનુસાર, અમેરિકાના સૌથી અમીર 1 ટકા પરિવારોમાંથી લગભગ અડધા પરિવારોમાં ત્રણ કે તેથી વધુ બાળકો છે. બીજી તરફ, ઓછી આવક ધરાવતા વર્ગમાં ત્રણ બાળકો ધરાવતા પરિવારોનું પ્રમાણ આશરે 40થી 43 ટકા છે.
1990ના દાયકાથી અમીર પરિવારોમાં વધી રહ્યું છે ચલણ
અહેવાલ મુજબ, અમેરિકાના ધનિક પરિવારોમાં વધુ બાળકો રાખવાનો ટ્રેન્ડ 1990ના દાયકાથી જોવા મળી રહ્યો છે. બીજી તરફ, ઓછી આવક ધરાવતા પરિવારોમાં આ ચલણમાં ઘટાડો થઈ રહ્યો છે.
અર્થશાસ્ત્રી માઈક કોન્ઝલના જણાવ્યા અનુસાર, અમીર પરિવારો માટે ત્રીજું બાળક હવે સ્ટેટસ સિમ્બોલ બની રહ્યું છે. મોંઘવારી અને બાળકોના ઉછેર પાછળ વધતા ખર્ચની અસર સામાન્ય પરિવારો પર વધુ જોવા મળે છે. જ્યારે આર્થિક રીતે સક્ષમ પરિવારો માટે આ ખર્ચ એટલો મોટો પડકાર નથી.
એક બાળકના ઉછેર પાછળ ₹3 કરોડનો ખર્ચ
અમેરિકામાં બાળકનો ઉછેર કરવો સામાન્ય પરિવાર માટે મોટો આર્થિક પડકાર બની રહ્યો છે. લેન્ડિંગટ્રીના અહેવાલ મુજબ, એક બાળકને જન્મથી 18 વર્ષની ઉંમર સુધી ઉછેરવા માટે સરેરાશ આશરે ₹3 કરોડનો ખર્ચ થાય છે.
આ પ્રમાણે એક બાળક પાછળ દર વર્ષે અંદાજે ₹15 લાખ ખર્ચ થાય છે. આ ખર્ચમાં ખોરાક, રહેઠાણ, પરિવહન, આરોગ્ય વીમો અને બાળકની સંભાળ જેવી જરૂરિયાતોનો સમાવેશ થાય છે. જોકે, પરિવારની આવક અને રહેવાના વિસ્તાર પ્રમાણે આ રકમમાં ફેરફાર થઈ શકે છે.
શરૂઆતના પાંચ વર્ષમાં સૌથી વધુ આર્થિક બોજ
બાળકના ઉછેરમાં શરૂઆતના પાંચ વર્ષ સૌથી વધુ ખર્ચાળ સાબિત થાય છે. અહેવાલ પ્રમાણે આ સમયગાળા દરમિયાન દર વર્ષે સરેરાશ આશરે ₹26 લાખનો ખર્ચ થાય છે. ખાસ કરીને ડે-કેર અને બાળકની સંભાળ માટેની સેવાઓ પાછળ મોટો ખર્ચ કરવો પડે છે.
જ્યારે બાળકની ઉંમર 6થી 18 વર્ષની થાય છે ત્યારે સરેરાશ વાર્ષિક ખર્ચ ઘટીને આશરે ₹10.7 લાખ થઈ જાય છે. તેમ છતાં શિક્ષણ, ખોરાક, રહેઠાણ, પરિવહન અને આરોગ્ય સંબંધિત ખર્ચ પરિવારની જવાબદારી બની રહે છે.
મધ્યમવર્ગ માટે મોટો પડકાર
અમેરિકાના મધ્યમવર્ગીય પરિવારો માટે ઘરનું ભાડું, વીજળી-પાણીનાં બિલ, બચત અને બાળકોની જરૂરિયાતો વચ્ચે સંતુલન જાળવવું મુશ્કેલ બની રહ્યું છે. આવી સ્થિતિમાં ત્રીજા બાળકનો ખર્ચ પરિવારના બજેટ પર વધારાનો બોજ ઊભો કરી શકે છે.
એક તરફ આર્થિક રીતે સક્ષમ પરિવારોમાં મોટા પરિવાર રાખવાનો ટ્રેન્ડ જોવા મળી રહ્યો છે, તો બીજી તરફ વધતી મોંઘવારી સામાન્ય પરિવારોના પરિવાર નિયોજનના નિર્ણયોને પ્રભાવિત કરી રહી છે.