અમદાવાદ ક્રાઈમ બ્રાન્ચ અને સુરત ક્રાઈમ બ્રાન્ચે સંયુક્ત કાર્યવાહી કરીને ગુજરાતમાં ડ્રગ્સની હેરાફેરી કરતા આંતરરાજ્ય નેટવર્કનો પર્દાફાશ કર્યો છે. અમદાવાદના CTM એક્સપ્રેસ હાઈવે પર આવેલા ટોલનાકા નજીકથી પોલીસે હેરોઈન અને મેફેડ્રોન (MD) ડ્રગ્સના જથ્થા સાથે ત્રણ આરોપીઓને ઝડપી પાડ્યા છે. પ્રાથમિક તપાસમાં આ ડ્રગ્સ ગુજરાતના અલગ-અલગ વિસ્તારોમાં સપ્લાય કરવાનું હોવાનું સામે આવ્યું છે.
હેરોઈન અને MD ડ્રગ્સ સહિત 7 કિલોથી વધુનો જથ્થો જપ્ત
પોલીસે પકડાયેલા ત્રણ આરોપીઓ પાસેથી કુલ 2,497.490 ગ્રામ મેફેડ્રોન અને 4,531.220 ગ્રામ હેરોઈન જપ્ત કર્યું છે. આમ, બંને પ્રકારના ડ્રગ્સનો કુલ જથ્થો 7 કિલોથી વધુ થાય છે. આપેલી વિગતો મુજબ, મેફેડ્રોનની કિંમત પ્રતિ કિલો રૂ. 1.2 કરોડ અને હેરોઈનની કિંમત પ્રતિ કિલો રૂ. 5 કરોડ ગણવામાં આવે છે. આ આધારે જપ્ત કરાયેલા ડ્રગ્સની અંદાજિત કિંમત રૂ. 25 કરોડથી વધુ થાય છે.
ત્રણેય આરોપીઓનો અગાઉનો ગુનાહિત ઇતિહાસ
આ કેસમાં પોલીસે મૂળ દિલ્હી અને ઉત્તર પ્રદેશના ત્રણ આરોપીઓની ધરપકડ કરી છે. પકડાયેલા આરોપીઓમાં તિફેલ નોખેજ (ઉંમર 44), મોહમ્મદ ઈમરાન અલ્વી (ઉંમર 38) અને કફીલ અહેમદ (ઉંમર 59)નો સમાવેશ થાય છે.
પોલીસને મળેલી વિગતો અનુસાર, તિફેલ નોખેજ સામે અગાઉ અમૃતસરમાં 100 ગ્રામ હેરોઈન અને વર્ષ 2019માં 300 કિલો હેરોઈનની દાણચોરીના કેસમાં પાયલોટિંગ કરવાની સંડોવણીનો ઇતિહાસ છે.
બીજો આરોપી મોહમ્મદ ઈમરાન અલ્વી ઉત્તર પ્રદેશના મેરઠનો રહેવાસી છે. તેની સામે છેડતી, કબૂતરબાજી અને છેતરપિંડી સહિતના વિવિધ ગુનાઓમાં સંડોવણી હોવાની વિગતો સામે આવી છે.
ત્રીજો આરોપી કફીલ અહેમદ નવી દિલ્હીમાં રહે છે. તેની સામે અગાઉ જયપુરમાં 18.5 કિલો ચરસ, અમદાવાદમાં 100 ગ્રામ MD અને રાજસ્થાનમાં પેરોલ પર છૂટતી વખતે 3 કિલો એલ્પ્રાઝોલમ સાથે પકડાવા સહિતના ગુનાહિત કેસોનો ઇતિહાસ હોવાનું જણાવાયું છે.
ગુજરાતમાં ડ્રગ્સ સપ્લાય કરવાનું આયોજન
અમદાવાદના રામોલ પોલીસ સ્ટેશનની હદમાં આવતા CTM એક્સપ્રેસ હાઈવે ટોલનાકા નજીકથી આ જથ્થો મળી આવતાં ડ્રગ્સની હેરાફેરીના નેટવર્ક અંગે તપાસ તેજ કરવામાં આવી છે. પ્રાથમિક માહિતી મુજબ, જપ્ત કરાયેલો જથ્થો ગુજરાતનાં વિવિધ સ્થળોએ પહોંચાડવાનો હતો.
હાલ પોલીસે ત્રણેય આરોપીઓની ધરપકડ કરીને પૂછપરછ શરૂ કરી છે. ડ્રગ્સ ક્યાંથી લાવવામાં આવ્યું હતું, ગુજરાતમાં કોને સપ્લાય કરવાનું હતું અને આ નેટવર્કમાં અન્ય કેટલા લોકો સંડોવાયેલા છે તે સહિતની દિશામાં તપાસ હાથ ધરવામાં આવી રહી છે.