અમદાવાદ: ગુજરાતમાં આજે ડબલ ઋતુનો વિચિત્ર અનુભવ થઈ રહ્યો છે. રાજ્યના હવામાનમાં આવેલા અચાનક પલટાને કારણે એક તરફ મુખ્ય શહેરોમાં કાળઝાળ ગરમી પડી રહી છે, તો બીજી તરફ ઉત્તર અને પૂર્વ ગુજરાતના કેટલાક જિલ્લાઓમાં ધોધમાર કમોસમી વરસાદ (માવઠું) વરસ્યો છે. વેસ્ટર્ન ડિસ્ટર્બન્સ અને સાયક્લોનિક સર્ક્યુલેશન જેવી સિસ્ટમ સક્રિય થતા મે મહિનાની ગરમી વચ્ચે વરસાદી માહોલ જોવા મળ્યો છે.
આજે 5 મે, 2026ની વહેલી સવારથી જ અરવલ્લી, મહીસાગર અને દાહોદ જિલ્લામાં વાતાવરણ પલટાયું હતું. અરવલ્લીના મોડાસા, માલપુર, મેઘરજ અને યાત્રાધામ શામળાજી પંથકમાં ભારે પવન સાથે વરસાદ ખાબક્યો હતો. મહીસાગરના કડાણા અને ખાનપુર પંથકમાં પણ પ્રિ-મોન્સુન એક્ટિવિટીના ભાગરૂપે વરસાદી ઝાપટાં પડ્યા હતા. જ્યારે દાહોદમાં લાંબા સમયના વિરામ બાદ આકાશ કાળા ડિબાંગ વાદળોથી ઘેરાયું હતું અને વરસાદ પડતા માર્ગો પર પાણી ફરી વળ્યા હતા, જેનાથી વાતાવરણમાં ઠંડક પ્રસરી છે.
ભર ઉનાળે થયેલા આ વરસાદથી સામાન્ય નાગરિકોને ગરમીમાં રાહત મળી છે, પરંતુ ખેડૂતો માટે આ આફત બનીને આવ્યો છે. ખેતરોમાં તૈયાર થયેલા મકાઈ, બાજરી અને પશુઓ માટેના ઘાસચારાના પાકને મોટાપાયે નુકસાન થવાની શક્યતા સેવાઈ રહી છે. કમોસમી વરસાદને પગલે જગતનો તાત ભારે ચિંતામાં મુકાયો છે.
વરસાદી માહોલ હોવા છતાં રાજ્યના મોટા શહેરોમાં ગરમીનું જોર ઘટવાનું નામ નથી લઈ રહ્યું. ખાસ કરીને અમદાવાદમાં આગામી 6 દિવસ માટે 'યલો એલર્ટ' જાહેર કરવામાં આવ્યું છે, જ્યાં પારો 41°C સુધી પહોંચી શકે છે. આ સિવાય ગાંધીનગર અને રાજકોટમાં પણ તાપમાન 40°C ને પાર રહેવાની શક્યતા છે. જોકે, સુરત અને દ્વારકા જેવા દરિયાકાંઠાના વિસ્તારોમાં તાપમાન 31°C થી 34°C વચ્ચે રહેતા ગરમીથી આંશિક રાહત મળશે.
હવામાન વિભાગના જણાવ્યા અનુસાર, આગામી 10 દિવસ સુધી રાજ્યમાં વાતાવરણ મુખ્યત્વે સૂકું રહેશે, પરંતુ ભેજ અને વેસ્ટર્ન ડિસ્ટર્બન્સના કારણે ઉકળાટ અને બફારો હજુ પણ લોકોને પરેશાન કરી શકે છે.
