ભૂલથી ખોટા UPI નંબર પર પૈસા મોકલી દીધા? તો ગભરાશો નહીં… કારણ કે પૈસા પાછા મેળવવાનો રસ્તો છે!
આજના સમયમાં PhonePe, Google Pay, Paytm કે BHIM જેવી UPI એપથી પૈસા મોકલવા માત્ર થોડી સેકન્ડનું કામ છે. પરંતુ ઉતાવળમાં ખોટા નંબર, UPI ID કે QR કોડ પર પેમેન્ટ થઈ જાય તો શું કરવું?
સૌથી પહેલાં ટ્રાન્ઝેક્શનનું સ્ટેટસ ચેક કરો. જો પેમેન્ટ પેન્ડિંગ કે ફેલ થયું હોય, તો રકમ સામાન્ય રીતે બેંક ખાતામાં પરત આવી શકે છે.
પરંતુ જો ટ્રાન્ઝેક્શન સક્સેસફુલ છે અને પૈસા તમારા ખાતામાંથી કપાઈને સામેની વ્યક્તિના ખાતામાં જમા થઈ ગયા છે, તો તરત કાર્યવાહી કરવી જરૂરી છે.
સૌથી પહેલા તમારી UPI એપના Help, Support અથવા Raise Complaint વિભાગમાં જઈને ખોટા ટ્રાન્ઝેક્શનની ફરિયાદ નોંધાવો.
ત્યારબાદ તમારી બેંકનો તરત સંપર્ક કરો. બેંકને UPI Transaction ID અથવા UTR નંબર, તારીખ, રકમ અને ટ્રાન્ઝેક્શનનો સ્ક્રીનશોટ આપો. બેંક, જરૂરિયાત મુજબ, રકમ મેળવનાર બેંકનો સંપર્ક કરીને પૈસા પરત મેળવવાની પ્રક્રિયા શરૂ કરી શકે છે.
જો એપ અને બેંક તરફથી યોગ્ય ઉકેલ ન મળે, તો NPCIના UPI Dispute Redressal Mechanism મારફતે ફરિયાદ આગળ વધારી શકાય છે.
અને જો ફરિયાદનો સંતોષકારક ઉકેલ ન આવે, તો RBIની Integrated Ombudsman Scheme હેઠળ ફરિયાદ કરવાનો વિકલ્પ પણ છે. સામાન્ય રીતે બેંક અથવા સંબંધિત સંસ્થાને ફરિયાદ કર્યા બાદ તેમની તરફથી જવાબ માટે નિર્ધારિત સમયગાળો પસાર થવો જરૂરી છે.
એક વાત ખાસ યાદ રાખજો—ખોટા UPI પેમેન્ટમાં જેટલી ઝડપથી ફરિયાદ કરશો, તેટલી જલદી રકમ પાછી મેળવવાની પ્રક્રિયા શરૂ થઈ શકે છે.