ગુજરાત ATS, ઇન્ડિયન કોસ્ટ ગાર્ડ અને SOGની સંયુક્ત કાર્યવાહીથી મોટો ડ્રગ્સ રેકેટ બહાર આવ્યો
ભારતના સરહદી અને દરિયાઈ વિસ્તારોનો ઉપયોગ કરીને નશાનો કાળો કારોબાર ચલાવતા તત્વો વિરુદ્ધ ગુજરાત પોલીસ અને કેન્દ્રીય એજન્સીઓએ મોટી કાર્યવાહી હાથ ધરી છે. ગુપ્ત માહિતીના આધારે ગુજરાત એન્ટી ટેરરિસ્ટ સ્ક્વોડ (ATS), ઇન્ડિયન કોસ્ટ ગાર્ડ અને કચ્છ SOGની ટીમોએ સંયુક્ત ઓપરેશન ચલાવી કચ્છના દરિયામાં એક શંકાસ્પદ જહાજને અટકાવ્યું હતું. તપાસ દરમિયાન જહાજમાંથી અંદાજે ₹1000 કરોડની કિંમતનું 115 કિલો કોકેઈન મળી આવ્યું હતું.
પ્રાપ્ત માહિતી મુજબ આ કોકેઈન અલગ-અલગ બેગમાં છુપાવીને રાખવામાં આવ્યું હતું અને તેનો જથ્થો દિલ્હી સુધી પહોંચાડવાની યોજના હતી. એજન્સીઓને અગાઉથી જ મોટા પ્રમાણમાં નશીલા પદાર્થોની હેરાફેરી થતી હોવાની માહિતી મળી હતી, જેના આધારે આ ઓપરેશન હાથ ધરાયું હતું.
યુરોપ કનેક્શન અને આંતરરાષ્ટ્રીય નેટવર્કની તપાસ શરૂ
પ્રાથમિક તપાસમાં સામે આવ્યું છે કે પકડાયેલો નશીલા પદાર્થોનો જથ્થો યુરોપના દેશોમાંથી સમુદ્ર માર્ગે ભારત લાવવામાં આવી રહ્યો હતો. હવે સુરક્ષા એજન્સીઓ આ સમગ્ર રેકેટ પાછળ કાર્યરત આંતરરાષ્ટ્રીય માફિયા, સ્થાનિક સપ્લાયર અને દેશમાં ડ્રગ્સ ડિલિવરી ચેઇન સાથે જોડાયેલા તાર શોધવામાં લાગી ગઈ છે.
ગુજરાત ATS, ઇન્ડિયન કોસ્ટ ગાર્ડ અને કચ્છ SOG દ્વારા હાથ ધરાયેલી આ કાર્યવાહી રાજ્યમાં અત્યાર સુધીની મોટી ડ્રગ્સ જપ્તીની ઘટનાઓમાંની એક માનવામાં આવી રહી છે.
