ચેન્નાઈ એરપોર્ટ પર ઈન્ડિગો ફ્લાઈટનું ઈમર્જન્સી લેન્ડિંગ

ચેન્નાઈ એરપોર્ટ પર મંગળવારે મોડી રાત્રે ઈન્ડિગોની ફ્લાઈટનું ઈમર્જન્સી લેન્ડિંગ કરવામાં આવ્યું હતું. કોલકાતાથી ચેન્નાઈ જઈ રહેલી આ ફ્લાઈટના લેન્ડિંગના થોડા સમય પહેલાં ડાબા એન્જિનમાં ટેકનિકલ ખામી સર્જાઈ હતી. પાઈલોટે તાત્કાલિક એર ટ્રાફિક કંટ્રોલને તેની જાણ કરી હતી. ત્યારબાદ રાત્રે 11:29 વાગ્યે ચેન્નાઈ એરપોર્ટ પર ઈમર્જન્સી જાહેર કરવામાં આવી હતી. ઈમર્જન્સી રિસ્પોન્સ સિસ્ટમ સક્રિય કરવામાં આવ્યા બાદ વિમાને રાત્રે 11:37 વાગ્યે રનવે 25 પર સુરક્ષિત લેન્ડિંગ કર્યું હતું. આ ફ્લાઈટમાં કુલ 224 મુસાફરો અને ક્રૂ મેમ્બર સહિત લોકો સવાર હતા. સદનસીબે, તમામ લોકો સુરક્ષિત રીતે વિમાનમાંથી બહાર આવ્યા હતા. વિમાનના સુરક્ષિત લેન્ડિંગ બાદ રાત્રે 11:47 વાગ્યે ઈમર્જન્સી પાછી ખેંચી લેવામાં આવી હતી. હાલ ટેકનિકલ ટીમ દ્વારા વિમાનના ડાબા એન્જિનમાં ખરાબીનું ચોક્કસ કારણ શોધવા માટે તપાસ શરૂ કરવામાં આવી છે.