મહિલા કોર્પોરેટરે સ્ટેન્ડિંગ કમિટીમાં ઉગ્ર રજૂઆત કરતાં સેનેટરી વિભાગ હરકતમાં આવ્યો; સફાઈ કામગીરીથી સ્થાનિક રહીશો અને મોર્નિંગ વોકર્સને રાહત
આણંદ: શહેરના લોટેશ્વર તળાવ વિસ્તારમાં લાંબા સમયથી ફેલાયેલી ગંદકીને લઈને આખરે મહાનગરપાલિકાનું તંત્ર હરકતમાં આવ્યું છે. સ્થાનિક રહીશો અને મોર્નિંગ વોકર્સની મુશ્કેલીઓ તેમજ મહિલા કોર્પોરેટરની વારંવારની રજૂઆતો બાદ ગુરુવાર સવારથી સેનેટરી વિભાગ દ્વારા યુદ્ધના ધોરણે સફાઈ કામગીરી હાથ ધરવામાં આવી હતી.
ગંદકી અને દુર્ગંધથી લોકો પરેશાન
આણંદ શહેરમાં આવેલા લોટેશ્વર તળાવ નજીક લોટેશ્વર મહાદેવનું મંદિર આવેલું છે. તળાવની આસપાસ સુંદર વોકિંગ ટ્રેક હોવાથી દરરોજ વહેલી સવારે અને સાંજે મોટી સંખ્યામાં નગરજનો ચાલવા માટે અહીં આવે છે.
જોકે, છેલ્લા કેટલાક સમયથી તળાવ અને તેની આસપાસ કચરો તથા ગંદકી એકઠી થતાં સમગ્ર વિસ્તારમાં અસહ્ય દુર્ગંધ ફેલાઈ હતી. તેના કારણે મોર્નિંગ વોકર્સ સહિત સ્થાનિક રહીશોને ભારે હાલાકીનો સામનો કરવો પડતો હતો.
બે વખત રજૂઆત છતાં 15 દિવસ સુધી સફાઈ નહીં
વિસ્તારમાં ફેલાયેલી ગંદકીથી પરેશાન સ્થાનિક રહીશોએ આ મામલે મહિલા કોર્પોરેટર સમક્ષ રજૂઆત કરી હતી. લોકોની ફરિયાદને પગલે મહિલા કોર્પોરેટરે મહાનગરપાલિકાના સેનેટરી વિભાગને બે વખત ફોન કરીને તાત્કાલિક સફાઈ કરાવવા માટે જણાવ્યું હતું.
પરંતુ, રજૂઆતના 15 દિવસ બાદ પણ સફાઈ કામગીરી હાથ ધરવામાં ન આવતાં તંત્રની કામગીરી સામે સવાલો ઊભા થયા હતા.
સ્ટેન્ડિંગ કમિટીમાં આક્રોશ બાદ તંત્ર જાગ્યું
સેનેટરી વિભાગ દ્વારા યોગ્ય કાર્યવાહી કરવામાં ન આવતાં મહિલા કોર્પોરેટરે આખરે સ્ટેન્ડિંગ કમિટીની બેઠકમાં સત્તાધીશો સમક્ષ આ મુદ્દે આક્રોશ વ્યક્ત કર્યો હતો. ત્યારબાદ ગુરુવારે સેનેટરી વિભાગની ટીમો સફાઈનાં સાધનો સાથે લોટેશ્વર તળાવ ખાતે પહોંચી હતી.
કચરો દૂર કરી જંતુનાશક દવાનો છંટકાવ
સફાઈ કામગીરી દરમિયાન તળાવની આસપાસ એકઠો થયેલો કચરો અને ગંદકી દૂર કરવાની સાથે જંતુનાશક દવાઓનો છંટકાવ પણ શરૂ કરવામાં આવ્યો હતો. લાંબા સમયથી ગંદકીની સમસ્યાથી પરેશાન સ્થાનિક રહીશો અને મોર્નિંગ વોકર્સે સફાઈ કામગીરી શરૂ થતાં રાહતનો શ્વાસ લીધો હતો.
જોકે, હવે તળાવની આસપાસ નિયમિત સફાઈ જળવાઈ રહે અને ફરીથી ગંદકી ન ફેલાય તે માટે મહાનગરપાલિકા દ્વારા સતત દેખરેખ રાખવામાં આવે તે જરૂરી છે.