ઈરાન પર કરાયેલા વળતા હવાઈ પ્રહાર બાદ ઇઝરાયલમાં સુરક્ષા સ્થિતિ અત્યંત તંગ બની છે. દેશભરમાં હાઈ એલર્ટ જાહેર કરવામાં આવ્યો છે અને નાગરિક સુરક્ષાને ધ્યાનમાં રાખીને કડક નિયંત્રણો લાગુ કરવામાં આવ્યા છે. Israel Defense Forces (IDF) ના હોમ ફ્રન્ટ કમાન્ડે તાત્કાલિક અસરથી તમામ શૈક્ષણિક પ્રવૃત્તિઓ, જાહેર મેળાવડાઓ અને બિન-આવશ્યક કામકાજ પર પ્રતિબંધ મૂકવાનો આદેશ આપ્યો છે. આ નિર્ણય પરિસ્થિતિની તાજી સમીક્ષા બાદ લેવામાં આવ્યો હોવાનું સત્તાવાર રીતે જણાવાયું છે.
ઇઝરાયલી સૈન્ય અનુસાર, ઈરાન સામે કરવામાં આવેલ ‘પ્રી-એમ્પટિવ સ્ટ્રાઈક’ બાદ સંભવિત પ્રતિકારાત્મક હુમલાની શક્યતા ધ્યાનમાં રાખીને આ પગલાં લેવામાં આવ્યા છે. સંરક્ષણ મંત્રાલયે આ કાર્યવાહી ને રાષ્ટ્રીય સુરક્ષા માટે અનિવાર્ય ગણાવી છે. શૈક્ષણિક સંસ્થાઓ, જાહેર કાર્યક્રમો અને કાર્યસ્થળો પર લાગુ કરાયેલા આ વ્યાપક પ્રતિબંધો દેશની અંદરની ચિંતાજનક સ્થિતિને દર્શાવે છે.
સેનાએ સ્પષ્ટ કર્યું છે કે આવશ્યક સેવાઓ સાથે જોડાયેલા ક્ષેત્રો—જેમ કે આરોગ્ય, સુરક્ષા અને જરૂરી પુરવઠા સેવાઓ—કાર્યરત રહેશે. વધતા પ્રાદેશિક તણાવ વચ્ચે નાગરિકોની સુરક્ષા સુનિશ્ચિત કરવા માટે વધારાના સુરક્ષા બંદોબસ્ત પણ ગોઠવવામાં આવ્યા છે. ઇઝરાયલ સરકાર પરિસ્થિતિ પર સતત નજર રાખી રહી છે અને સંભવિત જોખમોને પહોંચી વળવા વધુ પગલાં લેવાની તૈયારીમાં છે.
