સ્મૃતિ મંધાના, હરમનપ્રીત કૌર સહિત ભારતીય સ્ટાર ખેલાડીઓનું વડોદરામાં ભવ્ય સ્વાગત; કોટંબી સ્ટેડિયમમાં ત્રણ આંતરરાષ્ટ્રીય મુકાબલા રમાશે
વડોદરા: વડોદરા ફરી એકવાર આંતરરાષ્ટ્રીય મહિલા ક્રિકેટના રોમાંચ માટે સજ્જ બન્યું છે. કોટંબી સ્થિત બરોડા ક્રિકેટ એસોસિએશનના સ્ટેડિયમ ખાતે ભારત અને ઝિમ્બાબ્વેની મહિલા ક્રિકેટ ટીમો વચ્ચે ત્રણ મેચની વનડે આંતરરાષ્ટ્રીય સિરીઝ રમાવાની છે. આગામી 23, 25 અને 28 ઑક્ટોબરે યોજાનારા આ મુકાબલાઓને લઈને ક્રિકેટપ્રેમીઓમાં ભારે ઉત્સાહ જોવા મળી રહ્યો છે.
સિરીઝમાં ભાગ લેવા માટે ભારતીય મહિલા ક્રિકેટ ટીમનું વડોદરા એરપોર્ટ પર આગમન થતાં જ ખેલાડીઓનું ભવ્ય સ્વાગત કરવામાં આવ્યું હતું. સ્ટાર ખેલાડીઓને જોવા અને તેમની સાથે યાદગાર ક્ષણો માણવા માટે ચાહકોમાં ખાસ ઉત્સુકતા જોવા મળી રહી છે.
સ્મૃતિ મંધાના અને હરમનપ્રીત કૌર મુખ્ય આકર્ષણ
ભારતીય મહિલા ટીમની નવનિયુક્ત કપ્તાન સ્મૃતિ મંધાના, અનુભવી ખેલાડી હરમનપ્રીત કૌર, વનડે ટીમનાં ઉપકપ્તાન દીપ્તિ શર્મા અને વડોદરાની દીકરી યાસ્તિકા ભાટિયા સહિતની ખેલાડીઓના આગમનથી ક્રિકેટપ્રેમીઓનો ઉત્સાહ વધ્યો છે. સ્થાનિક ચાહકો માટે પોતાની મનપસંદ ખેલાડીઓને ઘરઆંગણે આંતરરાષ્ટ્રીય મેચ રમતી જોવાની આ ખાસ તક બની રહેશે.
ટિકિટ ખરીદીમાં ચાહકોનો ઉત્સાહ
ભારત-ઝિમ્બાબ્વે સિરીઝની ટિકિટો માટે પણ સારો પ્રતિસાદ મળી રહ્યો છે. ‘ટિકિટ જીની’ એપ મારફતે ચાહકો ટિકિટ ખરીદી રહ્યા છે. બરોડા ક્રિકેટ એસોસિએશનના ટિકિટ વિતરણ કાર્યક્રમમાં 900થી વધુ સભ્યોએ ત્રણેય મેચોની ટિકિટો મેળવી લીધી છે. આ પ્રતિસાદથી કોટંબી સ્ટેડિયમમાં મેચ દરમિયાન મોટી સંખ્યામાં ક્રિકેટપ્રેમીઓ ઉમટી પડે તેવી અપેક્ષા છે.
બંને ટીમો માટે હોટેલમાં રોકાણની વ્યવસ્થા
ભારતીય મહિલા ટીમ વડોદરા એરપોર્ટથી નીલાંબર સર્કલ નજીક આવેલા હયાત પ્લેસ વડોદરા ખાતે પહોંચશે, જ્યાં ટીમના રોકાણની વ્યવસ્થા કરવામાં આવી છે.
બીજી તરફ, ઝિમ્બાબ્વેની મહિલા ટીમનું પણ વડોદરામાં આગમન નિર્ધારિત છે. ટીમ આર.સી. દત્ત રોડ, અલકાપુરી સ્થિત વેલકમહોટેલ બાય આઈટીસી હોટલ્સમાં રોકાશે.
કોટંબી સ્ટેડિયમમાં ત્રણ દિવસ ક્રિકેટનો રોમાંચ
23, 25 અને 28 ઑક્ટોબરે યોજાનારી ત્રણેય વનડે મેચોમાં બંને ટીમો વચ્ચે રસપ્રદ મુકાબલા જોવા મળશે. બેટિંગ અને બોલિંગની ટક્કર વચ્ચે ભારતીય ટીમના પ્રદર્શન પર ચાહકોની નજર રહેશે. આંતરરાષ્ટ્રીય મહિલા ક્રિકેટને પ્રોત્સાહન આપતી આ સિરીઝ વડોદરાના રમતગમતપ્રેમીઓ માટે પણ વિશેષ આકર્ષણ બની રહેશે.
બંને ટીમોના આગમન સાથે શહેરમાં ક્રિકેટનો માહોલ જામ્યો છે અને હવે ચાહકોની નજર કોટંબી સ્ટેડિયમમાં યોજાનારી મેચો પર ટકેલી છે.