નવી દિલ્હી: દેશમાં ઈંધણ બચાવવા અને કરકસર કરવા માટે વડાપ્રધાન નરેન્દ્ર મોદી દ્વારા કરવામાં આવેલી અપીલના બીજા જ દિવસે કેન્દ્રીય જળશક્તિ મંત્રી સી.આર. પાટીલે એક અત્યંત પ્રશંસનીય અને આદર્શ નિર્ણય લીધો છે. રાષ્ટ્રહિતમાં ઈંધણના વપરાશને ઘટાડવા માટે, તેમણે જ્યાં સુધી મધ્ય-પૂર્વના તણાવ અને ક્રૂડ ઓઈલની અસ્થિરતાની સ્થિતિ સામાન્ય ન થાય ત્યાં સુધી પોતાના તમામ કાર્યક્રમોમાં પાયલોટિંગ અને એસ્કોર્ટ ગાડીઓનો ઉપયોગ નહીં કરવાનો નિર્ણય જાહેર કર્યો છે.
કેન્દ્રીય મંત્રી સી.આર. પાટીલે આજે સવારથી જ આ નિર્ણયનો અમલ શરૂ કરી દીધો છે. તેઓ તેમના નિર્ધારિત સરકારી અને જાહેર કાર્યક્રમોમાં કોઈપણ વધારાના કાફલા કે એસ્કોર્ટ વાહનો વિના જ રવાના થયા હતા. એક જવાબદાર જનપ્રતિનિધિ તરીકે ઈંધણ બચાવવું એ પોતાની નૈતિક ફરજ હોવાનું જણાવી પાટીલે કહ્યું કે, જ્યારે દેશ ઊર્જા સંકટના પડકાર સામે ઝઝૂમી રહ્યો છે ત્યારે આવી કરકસર અનિવાર્ય છે.
કેન્દ્રીય મંત્રીના આ આદર્શવાદી પગલાથી સમગ્ર ભાજપ શાસિત રાજ્યોના મંત્રીમંડળ અને અન્ય નેતાઓ માટે એક નવી પ્રેરણા ઊભી થઈ છે. સામાન્ય રીતે સુરક્ષા અને પ્રોટોકોલના નામે મોટા કાફલાઓનો વપરાશ થતો હોય છે, પરંતુ સી.આર. પાટીલે સાદગી અને કર્તવ્યનિષ્ઠાનું ઉદાહરણ પૂરું પાડીને સાબિત કર્યું છે કે જ્યારે નેતૃત્વ પોતે અમલ કરે ત્યારે સમાજમાં મોટું પરિવર્તન આવી શકે છે.
સી.આર. પાટીલના આ નિર્ણયનું સામાન્ય નાગરિકોમાં પણ સ્વાગત કરવામાં આવી રહ્યું છે. અગાઉ ‘જળ શક્તિ’ અને ‘કેચ ધ રેઈન’ જેવા અભિયાનોને સફળ બનાવનાર પાટીલ હવે ઈંધણ બચાવવાના આ જન-અભિયાનને વધુ વેગ આપવા માંગે છે. તેમના આ પગલાથી વાહનચાલકો અને સામાન્ય નાગરિકોમાં પણ ઈંધણ બચત પ્રત્યે જાગૃતિ વધશે તેવી અપેક્ષા રાખવામાં આવી રહી છે.
