ઉત્તર ગુજરાતમાં સ્થાનિક સ્વરાજની ચૂંટણીને લઈને રાજકીય માહોલ ગરમાયો છે. વાવ અને થરાદ પંથકમાં ફોર્મ ચકાસણી દરમિયાન વહીવટી તંત્રની કામગીરી વિવાદમાં આવી છે. કોંગ્રેસના સાંસદ Geniben Thakor એ અધિકારીઓ પર રાજકીય દબાણ હેઠળ પક્ષપાતી વલણ અપનાવવાનો ગંભીર આક્ષેપ કર્યો છે અને આ મુદ્દે આરપારની લડાઈના સંકેત આપ્યા છે.
થરાદની ભોરોલ જિલ્લા પંચાયત સીટ પર ઉમેદવાર જોગાજી રાજપૂતે કોંગ્રેસ અને ભાજપ બંને પક્ષમાંથી ફોર્મ ભરતા કાયદાકીય ગૂંચ ઉભી થઈ છે. ગેનીબેન ઠાકોરે જણાવ્યું કે ચૂંટણીના નિયમ મુજબ પહેલું ભરાયેલું ફોર્મ જ માન્ય ગણાવવું જોઈએ, પરંતુ વહીવટી તંત્ર સત્તાધારી પક્ષના ઈશારે ભેદભાવભર્યું વલણ અપનાવી રહ્યું છે.
બીજી તરફ, ભાભર તાલુકાની મીઠા સીટ પર કોંગ્રેસના ઉમેદવારનું ફોર્મ રદ થવાના મામલે પણ વિવાદ ઉગ્ર બન્યો છે. ગેનીબેન ઠાકોરે આક્ષેપ કર્યો કે પૂરતા દસ્તાવેજો હોવા છતાં રાજકીય દબાણ હેઠળ ફોર્મ રદ કરવામાં આવ્યું છે, જ્યારે સમાન પરિસ્થિતિમાં અન્ય ઉમેદવારોને મંજૂરી આપવામાં આવી છે. તેમણે જણાવ્યું કે આ મામલો હવે હાઈકોર્ટ સુધી લઈ જવામાં આવશે.
ચૂંટણી સમયે નજીકના સાથીના પક્ષપલટા મુદ્દે પણ ગેનીબેન ઠાકોરે કડક પ્રતિક્રિયા આપી છે. તેમણે કહ્યું કે જે લોકોએ પક્ષ અને જનતાનો વિશ્વાસ તોડ્યો છે, તેમને આવનારા સમયમાં પ્રજા જવાબ આપશે. સાથે જ તેમણે વહીવટી તંત્રને ચેતવણી આપી કે તેઓ પ્રજાના ટેક્સથી પગાર મેળવે છે અને કોઈપણ પક્ષના દબાણમાં આવીને કામ ન કરે. જો નિષ્પક્ષતા જાળવવામાં નહીં આવે તો કોંગ્રેસ દ્વારા ઉગ્ર આંદોલન કરવામાં આવશે. આ સમગ્ર મામલે સ્થાનિક રાજકીય અને વહીવટી વર્તુળોમાં ભારે ચર્ચા અને ચિંતા જોવા મળી રહી છે.
