આજે દેશભરમાં પાંચ રાજ્યોની વિધાનસભા ચૂંટણીના પરિણામો સાથે આણંદ જિલ્લાના ઉમરેઠ વિધાનસભા ક્ષેત્રની પેટાચૂંટણીનું પરિણામ પણ જાહેર થવાનું છે. વિદ્યાનગર સ્થિત બીજેવીએમ (BJVM) કોલેજ ખાતે મતગણતરીની પ્રક્રિયા સવારથી જ કડક સુરક્ષા વચ્ચે શરૂ કરવામાં આવી છે. મતગણતરી કેન્દ્ર પર અંદાજે 700 જેટલા અધિકારીઓ અને કર્મચારીઓને નિયુક્ત કરવામાં આવ્યા છે, જેથી સમગ્ર પ્રક્રિયા સુચારુ રીતે પૂર્ણ થઈ શકે.
ઉમરેઠ વિધાનસભા બેઠક ભાજપના પૂર્વ ધારાસભ્ય ગોવિંદ પરમારના નિધન બાદ ખાલી પડી હતી, જેને પગલે આ પેટાચૂંટણી યોજાઈ હતી. આ વખતે મતદાનમાં કુલ 59.04 ટકા જેટલું મતદાન નોંધાયું હતું, જે મતદારોની સક્રિય ભાગીદારી દર્શાવે છે.
ચૂંટણી મેદાનમાં ભાજપના ઉમેદવાર હર્ષદ પરમાર અને કોંગ્રેસના ઉમેદવાર ભૃગુરાજસિંહ ચૌહાણ વચ્ચે સીધી ટક્કર જોવા મળી રહી છે. હવે સૌની નજર મતગણતરીના અંતિમ પરિણામ પર ટકી છે કે આ બેઠક પર ભાજપ ફરી જીતનો ઝંડો લહેરાવશે કે પછી મતદારો પરિવર્તન તરફ વળશે.
