ઉમરેઠ: 111-ઉમરેઠ વિધાનસભા બેઠક પર યોજાઈ રહેલી પેટાચૂંટણીમાં સવારના ઉત્સાહ બાદ બપોર થતા જ આકરા તાપની સીધી અસર મતદાન પ્રક્રિયા પર જોવા મળી રહી છે. રાજ્યમાં પડી રહેલી ભીષણ ગરમી અને વધતા જતા પારાને કારણે મતદારોના જોશમાં નોંધપાત્ર ઘટાડો થયો છે.
ઓડ વિસ્તારના મતદાન મથકો ખાલીખમ
બપોરના સમયે ગરમીનો પ્રકોપ એટલો આકરો છે કે ખાસ કરીને ઓડ વિસ્તારના મોટાભાગના મતદાન મથકો હાલ ખાલીખમ નજરે પડી રહ્યા છે. સવારે 7 થી 11 વાગ્યા સુધી મતદારોની જે લાંબી કતારો જોવા મળતી હતી, તે બપોર પડતા જ અદ્રશ્ય થઈ ગઈ છે. આકરા તડકાને કારણે મતદારોએ ઘરની બહાર નીકળવાનું ટાળ્યું છે, જેના પરિણામે મતદાનની ગતિ ધીમી પડી છે.
સાંજે ફરી ધસારો વધવાની શક્યતા
વહીવટી તંત્ર દ્વારા મતદાન મથકો પર શેડ અને પીવાના પાણીની વ્યવસ્થા કરવામાં આવી હોવા છતાં, હીટવેવની સ્થિતિને જોતા લોકો બપોરના સમયે બહાર આવવાનું જોખમ ખેડતા નથી. રાજકીય વિશ્લેષકોનું માનવું છે કે સાંજ સુધીમાં તાપમાન ઘટતા ફરીથી મતદાન મથકો પર મતદારોની લાઈનો લાગે તેવી શક્યતા છે. હવે જોવાનું એ રહેશે કે સાંજના છેલ્લા કલાકોમાં કેટલું મતદાન થાય છે.
