તહેવારોની સિઝન વચ્ચે સામાન્ય ગ્રાહકોને મોંઘવારીનો વધુ એક ઝટકો લાગ્યો છે. દેશની જાણીતી ડેરી બ્રાન્ડ અમૂલે ઘી અને બટરના ભાવમાં વધારો કર્યો છે. વિવિધ પ્રોડક્ટ્સના ભાવમાં ₹3થી લઈને ₹50 સુધીનો વધારો કરવામાં આવ્યો છે. ખાસ કરીને 1 કિલો ઘીના કાર્ટનના ભાવમાં ₹50નો વધારો થતાં હવે ગ્રાહકોએ તેના માટે વધુ કિંમત ચૂકવવી પડશે.
અમૂલના નવા ભાવ પ્રમાણે 1 કિલો ઘીના કાર્ટનની કિંમત ₹630થી વધારીને ₹680 કરવામાં આવી છે. જ્યારે 500 ગ્રામ પ્યોર ઘીના પાઉચના ભાવમાં ₹20નો વધારો થયો છે. બીજી તરફ, બટરના 100 ગ્રામના પેકેટમાં ₹3 અને 500 ગ્રામના પેકેટમાં ₹15નો વધારો કરવામાં આવ્યો છે.
અમૂલની કઈ પ્રોડક્ટ કેટલી મોંઘી થઈ?
પ્રોડક્ટજૂની કિંમતનવી કિંમતઘી (1 કિલો કાર્ટન)₹630₹680પ્યોર ઘી (500 ગ્રામ)₹325₹345બટર (100 ગ્રામ)₹63₹66બટર (500 ગ્રામ)₹310₹325GSTમાં ઘટાડા બાદ મળેલી રાહત પર મોંઘવારીનો માર
ઉલ્લેખનીય છે કે સપ્ટેમ્બર 2025માં GSTના દરમાં ઘટાડો થયા બાદ અમૂલે તેની અંદાજે 700 ડેરી પ્રોડક્ટ્સના ભાવમાં ઘટાડો કર્યો હતો. તે સમયે ડેરી પ્રોડક્ટ્સ પર GST 12 ટકાથી ઘટાડીને 5 ટકા કરવામાં આવ્યો હતો.
GST ઘટાડા બાદ 1 કિલો ઘીના કાર્ટનનો ભાવ ₹650થી ઘટીને ₹610 થયો હતો. જ્યારે 5 કિલોના ઘીના ટિનની કિંમત ₹3,275થી ઘટીને ₹3,075 થઈ હતી. બટરના 100 ગ્રામના પેકેટનો ભાવ ₹62થી ઘટીને ₹58 અને 500 ગ્રામના પેકેટનો ભાવ ₹305થી ઘટીને ₹285 થયો હતો.
જોકે, હવે ભાવમાં ફરી વધારો થતાં ગ્રાહકોને અગાઉ GST ઘટાડા વખતે મળેલી રાહતનો કેટલોક લાભ ઓછો થઈ શકે છે.
અમદાવાદ અને વડોદરામાં અમૂલ ઘીની અછતની ફરિયાદ
માત્ર ભાવવધારો જ નહીં, પરંતુ અમૂલના કેટલાક ડેરી પ્રોડક્ટ્સની ઉપલબ્ધતાને લઈને પણ મુશ્કેલીઓ સામે આવી રહી છે. અમદાવાદ અને વડોદરાના કેટલાક દુકાનદારોએ ઘીનો સ્ટોક ઓછો થઈ રહ્યો હોવાની માહિતી આપી છે.
ગણેશોત્સવ બાદ કાઉ ઘીની માગમાં વધારો થતાં તેની ઉપલબ્ધતા પર અસર પડી હોવાનું જણાવવામાં આવ્યું છે. અમદાવાદના સેટેલાઇટ વિસ્તારમાં આવેલા એક ડી-માર્ટ સ્ટોરમાં પણ અમૂલ ઘી અને બટરનો સ્ટોક ઉપલબ્ધ ન હોવાનું સામે આવ્યું હતું.
ગુજરાત ઉપરાંત પુણે અને કોલકાતામાં પણ જુલાઈ અને સપ્ટેમ્બર દરમિયાન ડેરી પ્રોડક્ટ્સના સપ્લાયને લઈને ફરિયાદો નોંધાઈ હતી.
નકલી ઘી સામેની કાર્યવાહી બાદ બ્રાન્ડેડ ઘીની માગ વધી
અમૂલ સાથે જોડાયેલા એક સહકારી નેતાના જણાવ્યા અનુસાર ગુજરાત અને રાજસ્થાનમાં નકલી ઘી વિરુદ્ધ કરવામાં આવેલી કાર્યવાહીને પગલે બ્રાન્ડેડ ઘીની માગમાં મોટો વધારો થયો છે.
છેલ્લા છ મહિનામાં બંને રાજ્યોના અલગ-અલગ વિસ્તારોમાંથી આશરે 2 લાખ કિલો નકલી ઘી જપ્ત કરવામાં આવ્યું હોવાનું જણાવાયું છે. આ કાર્યવાહી બાદ ગ્રાહકોમાં બ્રાન્ડેડ ઘી પ્રત્યે વિશ્વાસ વધ્યો છે અને અમૂલ જેવી જાણીતી બ્રાન્ડની ખરીદી વધી છે.
તેમણે વધુમાં જણાવ્યું કે વર્ષ દરમિયાન વેચાતા કુલ ઘીમાંથી આશરે 45 ટકા ઘીનો વપરાશ માત્ર તહેવારોની સિઝનમાં થાય છે. તહેવારો દરમિયાન અચાનક વધતી માગના કારણે સપ્લાય પર દબાણ ઊભું થયું છે.
ગ્રાહકોના ખિસ્સા પર વધશે ભાર
તહેવારોમાં ઘી અને બટરનો વપરાશ સામાન્ય દિવસોની સરખામણીએ વધુ રહે છે. આવી સ્થિતિમાં અમૂલ દ્વારા કરવામાં આવેલા ભાવવધારાની સીધી અસર ગ્રાહકોના ઘરખર્ચ પર પડી શકે છે. હવે જોવાનું એ રહેશે કે આગામી દિવસોમાં ડેરી પ્રોડક્ટ્સનો સપ્લાય સામાન્ય થાય છે કે નહીં અને ભાવમાં વધુ ફેરફાર થાય છે કે કેમ.