તારાપુર-વટામણ રોડ પર ઈસરવાડા ગામ નજીક પોલીસે વિદેશી દારૂના જથ્થા સાથે એક શખ્સને ઝડપી પાડ્યો છે.
પોલીસને બાતમી મળી હતી કે વાસદ તરફથી એક સફેદ રંગની નંબર પ્લેટ વગરની i20 કારમાં વિદેશી દારૂનો મોટો જથ્થો ભરીને બોટાદ તરફ લઈ જવામાં આવી રહ્યો છે.
બાતમીના આધારે પોલીસે ઈસરવાડા બ્રિજ નજીક વોચ ગોઠવીને નાકાબંધી કરી હતી.
દરમિયાન બાતમીવાળી કાર ત્યાંથી પસાર થઈ હતી. પોલીસને જોઈને કારના ચાલકે ભાગવાનો પ્રયાસ કર્યો હતો. જોકે, પૂરઝડપે જતી કાર કાબૂમાં ન રહેતા ડિવાઈડર સાથે અથડાઈને ત્યાં જ ઊભી રહી ગઈ હતી.
પોલીસે તાત્કાલિક કારના ચાલકને ઝડપી પાડ્યો હતો. તેની પૂછપરછ કરતા તેણે પોતાનું નામ હિતેશ જેમા ગોવિંદીયા, રહે. બોટાદ હોવાનું જણાવ્યું હતું.
ત્યારબાદ પોલીસે કારની તલાશી લેતા અંદરથી બીયરના 300 ટીન મળી આવ્યા હતા, જેની કિંમત આશરે 45 હજાર રૂપિયા હોવાનું સામે આવ્યું છે.
આ ઉપરાંત કારમાંથી GJ-18 BE-4243 નંબરની નંબર પ્લેટ, ચાલક પાસેથી 340 રૂપિયા રોકડા અને એક મોબાઈલ ફોન પણ મળી આવ્યો હતો.
પોલીસે કાર સહિત કુલ 2.50 લાખ રૂપિયાથી વધુનો મુદ્દામાલ જપ્ત કર્યો છે.
આ મામલે પોલીસે પ્રોહિબિશન એક્ટની વિવિધ કલમો હેઠળ ગુનો નોંધીને પકડાયેલા ચાલકના રિમાન્ડ મેળવવાની કાર્યવાહી શરૂ કરી છે.
હવે પોલીસ તપાસ કરશે કે આ દારૂનો જથ્થો ક્યાંથી લાવવામાં આવ્યો હતો, કોને પહોંચાડવાનો હતો અને આ નેટવર્કમાં અન્ય કેટલા લોકો સંકળાયેલા છે.