સરસાણા AC ડોમ ખાતે બજરંગ દળના કાર્યકરોનો વિરોધ; ઘટનાને પગલે અલથાણ પોલીસ ઘટનાસ્થળે પહોંચી, સિક્યુરિટી એજન્સી બદલવાની માગ ઉઠી
સુરતના સરસાણા સ્થિત AC ડોમ ખાતે આયોજિત ‘OG નવરાત્રિ’ ગરબા મહોત્સવમાં મોડી રાત્રે બાઉન્સરોની ધાર્મિક ઓળખને લઈને વિવાદ સર્જાયો હતો. બજરંગ દળના કાર્યકરોને ગરબા મહોત્સવમાં સુરક્ષા વ્યવસ્થાની જવાબદારી સંભાળી રહેલા કેટલાક બાઉન્સરો લઘુમતી સમુદાયના હોવાની જાણ થતાં તેઓ સ્થળ પર પહોંચ્યા હતા અને વિરોધ નોંધાવ્યો હતો. ઘટનાની જાણ થતાં અલથાણ પોલીસનો કાફલો પણ સ્થળ પર પહોંચ્યો હતો.
સોશિયલ મીડિયા વીડિયો બાદ વિવાદ વકર્યો
મળતી માહિતી મુજબ, ગરબા મહોત્સવમાં સુરક્ષા વ્યવસ્થા માટે તહેનાત પાંચથી છ જેટલા બાઉન્સરો લઘુમતી સમુદાયના હોવાની માહિતી બજરંગ દળના કાર્યકરોને મળી હતી. આ બાઉન્સરોએ ‘OG નવરાત્રિ’માં સિક્યુરિટી ડ્યૂટી કરી રહ્યા હોવાનો વીડિયો ઇન્સ્ટાગ્રામ પર શેર કર્યો હોવાનું પણ જણાવાયું છે.
આ વીડિયો અને મળેલી માહિતીને પગલે બજરંગ દળના જિલ્લા તથા સ્થાનિક કાર્યકરો સરસાણા સ્થિત ગરબા ડોમ ખાતે પહોંચ્યા હતા. ત્યાં બાઉન્સરોની નિમણૂક અને સિક્યુરિટી એજન્સીને લઈને વિરોધ નોંધાવવામાં આવ્યો હતો. અહેવાલો અનુસાર, આ બાઉન્સરોમાં એક મહિલા બાઉન્સરનો પણ સમાવેશ થતો હતો.
બજરંગ દળે સિક્યુરિટી એજન્સી સામે વાંધો ઉઠાવ્યો
બજરંગ દળના સહસંયોજક અભિષેક રાજપૂતે ટેલિફોનિક વાતચીતમાં જણાવ્યું હતું કે, કાર્યકરોને બાઉન્સરોની ધાર્મિક ઓળખ અંગે માહિતી મળતાં તેઓ સ્થળ પર પહોંચ્યા હતા. તેમના જણાવ્યા મુજબ, પાંચથી છ બાઉન્સરોને રોકીને પોલીસને સોંપવામાં આવ્યા હતા.
અભિષેક રાજપૂતે ગરબા મહોત્સવમાં સુરક્ષા માટે રાખવામાં આવેલી એજન્સી સામે વાંધો વ્યક્ત કર્યો હતો. તેમણે જણાવ્યું હતું કે, આ મુદ્દે આયોજકો અને સંબંધિત સિક્યુરિટી એજન્સી સામે કાર્યવાહી કરવાની માગ કરવામાં આવશે.
પોલીસ અને બજરંગ દળના આગેવાનો વચ્ચે બેઠકની તૈયારી
આ ઘટનાને પગલે અલથાણ પોલીસે સમગ્ર મામલે તપાસ અને આગળની કાર્યવાહી હાથ ધરી હોવાનું જણાવાયું છે. વિવાદ અંગે ચર્ચા કરવા માટે પોલીસ દ્વારા બજરંગ દળના આગેવાનો સાથે બેઠક યોજવાની તૈયારી પણ કરવામાં આવી છે.
બજરંગ દળના આગેવાનોએ બેઠકમાં હાલની સિક્યુરિટી એજન્સીને દૂર કરીને નવી એજન્સીની નિમણૂક કરવાની તેમજ જવાબદારો સામે કડક પગલાં ભરવાની રજૂઆત કરવાની વાત કરી છે.
હવે આયોજકો અને પોલીસના વલણ પર નજર
સરસાણા ખાતે બનેલી આ ઘટનાએ નવરાત્રિ મહોત્સવની સુરક્ષા વ્યવસ્થા અને સિક્યુરિટી એજન્સીની પસંદગીને લઈને ચર્ચા જગાવી છે. જોકે, સમગ્ર મામલે આયોજકોનો સત્તાવાર પક્ષ, પોલીસની અંતિમ કાર્યવાહી અને સંબંધિત બાઉન્સરોની સ્થિતિ અંગે વધુ સત્તાવાર વિગતો સામે આવવાની બાકી છે.
હાલમાં પોલીસની કાર્યવાહી અને બેઠકમાં શું નિર્ણય લેવામાં આવે છે તેના પર સૌની નજર છે.