સુરત: રાજ્યમાં શરૂ થયેલી રાષ્ટ્રીય વસ્તી ગણતરીની કવાયત વચ્ચે સુરતથી એક મહત્વના સમાચાર સામે આવ્યા છે. ગુજરાતના ગૃહ રાજ્યમંત્રી અને ઉપ મુખ્યમંત્રી (DyCM) હર્ષ સંઘવીએ ઓનલાઈન વસતી ગણતરી પ્રક્રિયામાં ઉત્સાહભેર ભાગ લઈ પોતાનું અને પોતાના પરિવારના તમામ સભ્યોનું નામ ઓનલાઈન પોર્ટલ મારફતે નોંધાવ્યું છે. આ ડિજિટલ પ્રક્રિયા સફળતાપૂર્વક પૂર્ણ કર્યા બાદ તેમણે રાજ્યના તમામ નાગરિકોને પણ આ મહત્વપૂર્ણ રાષ્ટ્રીય કવાયતમાં ડિજિટલ માધ્યમથી સક્રિય રીતે જોડાવા માટે ખાસ આહવાન કર્યું છે.
ગૃહમંત્રી હર્ષ સંઘવીએ વસતી ગણતરીના મહત્વ પર ભાર મૂકતા જણાવ્યું હતું કે, આ પ્રક્રિયા દેશ અને રાજ્યના સર્વાંગી વિકાસ માટે અત્યંત મહત્વપૂર્ણ છે. વસતી ગણતરીના ચોક્કસ ડેટાના આધારે જ સરકાર ભવિષ્યમાં નાગરિકો માટે વધુ સારી સુવિધાઓ, કલ્યાણકારી યોજનાઓ અને લાંબાગાળાનું આયોજન કરી શકે છે. તેમણે ઉમેર્યું કે, જો દેશના વધુમાં વધુ લોકો આ વખતે શરૂ કરાયેલી ઓનલાઈન પદ્ધતિ અપનાવશે, તો સમગ્ર પ્રક્રિયા ખૂબ જ ઝડપી, સચોટ અને પારદર્શક બની રહેશે.
બીજી તરફ, ગૃહમંત્રી તરીકે હર્ષ સંઘવીએ વસતી ગણતરીના નામે થતી સાયબર છેતરપિંડીથી બચવા માટે લોકોને એક મોટી અને ગંભીર સલાહ પણ આપી છે. તેમણે સ્પષ્ટ શબ્દોમાં જણાવ્યું કે, વસતી ગણતરીની પ્રક્રિયા દરમિયાન જો કોઈ અધિકારી તમારા ઘરે આવે અથવા ઓનલાઈન માધ્યમથી સંપર્ક કરે, તો પણ કોઈપણ સંજોગોમાં પોતાનો OTP (વન ટાઈમ પાસવર્ડ) કે બેન્કિંગને લગતી કોઈ વ્યક્તિગત માહિતી ક્યારેય શેર કરવી નહીં. સરકાર તરફથી વસતી ગણતરી માટે આવી કોઈ ખાનગી વિગતો માંગવામાં આવતી નથી. તેમણે લોકોને ડિજિટલ યુગમાં સાયબર ઠગાઈનો ભોગ બનતા અટકાવવા અને જાગૃત રહીને વસતી ગણતરી પૂર્ણ કરવા અનુરોધ કર્યો છે.
