સુરતમાં બીજા ખોડલધામના નિર્માણને લઈને ચાલી રહેલી લાંબા સમયની ચર્ચાઓ વચ્ચે હવે નવા ધાર્મિક સંકુલની સત્તાવાર જાહેરાત કરવામાં આવી છે. નવરાત્રિના પાવન અવસરે વરાછા વિસ્તારમાં ‘અન્નપૂર્ણા ખોડલધામ’ બનાવવાની જાહેરાત થતાં પાટીદાર સમાજમાં ઉત્સાહ જોવા મળી રહ્યો છે. આ પ્રોજેક્ટમાં પાટીદાર સમાજના અગ્રણી મુકેશ પટેલ મુખ્ય સ્વપ્નદ્રષ્ટા તરીકે સામે આવ્યા છે, જ્યારે જયંતિ એકલારા સહિતના અગ્રણીઓ પણ આ આયોજનમાં જોડાયા છે.
શેરી ઓટલો નવરાત્રી મહોત્સવમાં થઈ જાહેરાત
મોટા વરાછા ખાતે આયોજિત શેરી ઓટલો નવરાત્રી મહોત્સવ દરમિયાન હજારો ખેલૈયાઓ અને સમાજના અગ્રણીઓની હાજરીમાં અન્નપૂર્ણા ખોડલધામની જાહેરાત કરવામાં આવી હતી. ગરબાના ઉત્સવ વચ્ચે આ જાહેરાત થતાં સમગ્ર કાર્યક્રમ સ્થળે ઉત્સાહનો માહોલ છવાયો હતો. આ પ્રસંગે ભાવિ ધાર્મિક સંકુલની સંભવિત રચનાની ઝાંખી પણ રજૂ કરવામાં આવી હતી.
વરાછા વિસ્તારમાં થશે નિર્માણ, જમીનની વ્યવસ્થા પ્રગતિ હેઠળ
પાટીદાર અગ્રણી વિજય માંગુકિયાના જણાવ્યા અનુસાર, વરાછા વિસ્તારમાં અન્નપૂર્ણા ખોડલધામ બનાવવાનું આયોજન છે અને તેના માટે જમીન સંબંધિત વ્યવસ્થા આગળ વધી રહી છે. હાલમાં પ્રોજેક્ટની રૂપરેખા તૈયાર કરવામાં આવી રહી છે. આગામી સમયમાં નિર્માણ, જમીન અને ભૂમિપૂજન સહિતની વિગતો જાહેર થવાની શક્યતા છે.
મહિલા સશક્તિકરણ અને વડીલોની સેવા પર રહેશે ભાર
અન્નપૂર્ણા ખોડલધામનો હેતુ માત્ર ધાર્મિક સંકુલ પૂરતો મર્યાદિત નહીં રહે, પરંતુ સામાજિક સેવાકાર્યોને પણ પ્રોત્સાહન આપવાનો છે. આ આયોજનમાં મહિલા સશક્તિકરણને વેગ આપવા ઉપરાંત સમાજના વડીલો અને વયોવૃદ્ધોની સુવિધા તથા સેવા માટે વિવિધ પ્રવૃત્તિઓ હાથ ધરવાની યોજના હોવાનું જણાવાયું છે.
નરેશ પટેલની અગાઉની જાહેરાત બાદ સુરતમાં નવો વળાંક
સુરતમાં ખોડલધામ બનાવવાની ચર્ચા અગાઉ પણ થઈ હતી. આશરે પાંચ મહિના પહેલાં, 6 મેના રોજ સુરતમાં યોજાયેલી પત્રકાર પરિષદમાં કાગવડ ખોડલધામ ટ્રસ્ટના પ્રમુખ નરેશ પટેલે સુરતમાં ખોડલધામ બનાવવાની જાહેરાત કરી હતી. તે સમયે તેમણે અંત્રોલી વિસ્તારમાં 40 વીઘાથી વધુ જમીન સંપાદિત કરવામાં આવી હોવાનો દાવો કર્યો હતો. સાથે જ આસો નવરાત્રિ દરમિયાન ભૂમિપૂજન અને ત્યારબાદ નિર્માણકાર્ય શરૂ કરવાની યોજના અંગે પણ માહિતી આપી હતી.
હવે બીજી તરફ વરાછા વિસ્તારમાં ‘અન્નપૂર્ણા ખોડલધામ’ના નામે નવા પ્રોજેક્ટની જાહેરાત થતાં આ સમગ્ર મામલે નવો વળાંક આવ્યો છે. બંને આયોજન વચ્ચેનો સત્તાવાર સંબંધ, જમીનની અંતિમ વિગતો અને નિર્માણની સમયમર્યાદા અંગે હજુ વધુ સ્પષ્ટતા આવવાની બાકી છે.
આગામી દિવસોમાં અન્નપૂર્ણા ખોડલધામની વિસ્તૃત યોજના જાહેર થયા બાદ તેના નિર્માણ અને સામાજિક સેવાકાર્યો અંગે વધુ વિગતો સામે આવશે.