સુરતના ખજોદ ડમ્પિંગ સાઇટ પર લાગેલી આગને લઈને વિવાદ વધુ ઘેરાયો છે, જેમાં કચરા કૌભાંડને છુપાવવા માટે જ આગ લગાવવામાં આવી હોવાના આક્ષેપો થઈ રહ્યા છે. આ દરમિયાન પાલિકાએ જાહેર કરેલા નિવેદનમાં જણાવ્યું છે કે ગરમીના કારણે કચરામાં મીથેન ગેસ ઉત્પન્ન થતા આગ લાગી છે, પરંતુ આ સ્પષ્ટીકરણ પોતે જ ચર્ચાનો વિષય બની ગયું છે.
આ ઘટનાને વધુ શંકાસ્પદ બનાવે છે કે છેલ્લા 52 દિવસમાં આ બીજી વાર ડમ્પિંગ સાઇટ પર આગ લાગી છે. સાથે જ 213 કરોડના કોન્ટ્રાક્ટ પૂર્ણ થયા બાદ નવા કોન્ટ્રાક્ટર ન મળતા જૂની એજન્સીને જ વધુ 10 મહિના માટે કામ સોંપવામાં આવ્યું છે, જેના કારણે કૌભાંડના આક્ષેપો વધુ જોર પકડ્યા છે. આ મામલે મ્યુનિસિપલ કમિશ્નરથી લઈને મુખ્યમંત્રી સુધી ફરિયાદો કરવામાં આવી છે.
પાલિકા દ્વારા આગ બુઝાવવા માટે 13 ફાયર બ્રિગેડ ગાડીઓ, JCB અને પોક્લેન મશીનો સાથે સતત કામગીરી ચાલી રહી છે, જેમાં પાણીનો છંટકાવ, કચરાનું ટર્નિંગ અને માટી કવરિંગ જેવી પ્રક્રિયાઓ હાથ ધરવામાં આવી છે. તેમ છતાં મીથેન ગેસના કારણે આગ ફરી લાગવાની શક્યતા હોવાનો દાવો કરવામાં આવ્યો છે.
આ સમગ્ર ઘટનાને લઈને લોકોમાં શંકા અને અસંતોષ વધ્યો છે, કારણ કે પાલિકાનો ખુલાસો વિશ્વસનીય લાગે તેમ નથી. પરિણામે ખજોદ આગ મામલો હવે માત્ર અકસ્માત નહીં પરંતુ સંભવિત કૌભાંડ તરીકે પણ ચર્ચાનો કેન્દ્ર બની ગયો છે.
