વલ્લભ વિદ્યાનગર ખાતે આવેલી Sardar Patel University માં ‘નારી શક્તિ વંદન અધિનિયમ-૨૦૨૩’ અંતર્ગત ‘નારી વંદન પરિસંવાદ’નું ભવ્ય આયોજન ૧૩ એપ્રિલ, ૨૦૨૬ના રોજ કરવામાં આવ્યું હતું. ‘વિકસિત ભારત ૨૦૪૭’ના વિઝન સાથે મહિલા સશક્તિકરણને પ્રોત્સાહન આપવાના ઉદ્દેશથી યોજાયેલા આ સેમિનારમાં વિવિધ વિભાગોના પ્રોફેસરો, નિષ્ણાતો અને મોટી સંખ્યામાં વિદ્યાર્થીઓ ઉત્સાહપૂર્વક જોડાયા હતા.
કાર્યક્રમની શરૂઆત સવારે ૧૧ વાગ્યે યુનિવર્સિટી ગીત અને દીપ પ્રાગટ્યથી કરવામાં આવી હતી. ડૉ. દર્શના દવેએ ઉપસ્થિત મહેમાનોનું સ્વાગત કરી કાર્યક્રમની રૂપરેખા રજૂ કરી હતી. કુલપતિ પ્રો. ડૉ. નિરંજનભાઈ પટેલે પોતાના અધ્યક્ષીય ઉદ્બોધનમાં જણાવ્યું હતું કે રાષ્ટ્રના સર્વાંગી વિકાસ માટે નારી શક્તિનું યોગદાન અત્યંત મહત્વપૂર્ણ છે અને મહિલાઓને દરેક ક્ષેત્રમાં સમાન તક મળવી આવશ્યક છે.
પરિસંવાદ દરમિયાન ત્રણ મુખ્ય વિષયો પર ગહન ચર્ચા યોજાઈ હતી. પ્રથમ સત્રમાં મહિલાઓના નીતિ નિર્ધારણમાં પ્રતિનિધિત્વ અને સામાજિક-સાંસ્કૃતિક અવરોધો અંગે ચર્ચા થઈ, જેમાં મહિલાઓની નિર્ણય પ્રક્રિયામાં ભાગીદારી વધારવાની જરૂરિયાત પર ભાર મૂકાયો. દ્વિતીય સત્રમાં પંચાયતી રાજ અને રાજકીય ભાગીદારી વિષય પર મહિલાઓની સફળતાઓને ઉજાગર કરવામાં આવી અને તેમને સંસદ તથા વિધાનસભા સુધી વધુ પ્રતિનિધિત્વ આપવાની જરૂરિયાત દર્શાવવામાં આવી. તૃતીય સત્રમાં ‘વિકસિત ભારત ૨૦૪૭’ માટે મહિલાઓને પથદર્શક તરીકે માનીને Women-led Development તરફ દેશ આગળ વધી રહ્યો છે તે મુદ્દે વિશેષ ચર્ચા કરવામાં આવી.
પરિસંવાદના અંતે ‘નારી શક્તિ વંદન અધિનિયમ’ના પારદર્શક અને સમયબદ્ધ અમલીકરણ માટે મહત્વપૂર્ણ ઠરાવો પસાર કરવામાં આવ્યા. મહિલાઓને માત્ર લાભાર્થી નહીં પરંતુ નીતિ નિર્માણમાં સક્રિય ભાગીદાર તરીકે માન્યતા આપવી અને રાજકીય પક્ષોમાં મહિલાઓને અનિવાર્ય ક્વોટા આપવાની ભલામણો કરવામાં આવી.
કાર્યક્રમના અંતે ડૉ. ધૃતિ પટેલે આભારવિધિ કરી હતી. સમગ્ર કાર્યક્રમનું સંચાલન પ્રો. દર્શન દવે દ્વારા કરવામાં આવ્યું હતું, જ્યારે અહેવાલ રજૂઆત ડૉ. અંજુ કુંજડિયા અને ડૉ. રાજેશ્વરી પટેલે સંભાળી હતી. આ પરિસંવાદ મહિલા સશક્તિકરણ તરફનું એક મહત્વપૂર્ણ પગલું સાબિત થયો છે.
