બોલિવૂડના સુપરસ્ટાર સલમાન ખાનની આગામી વૉર ડ્રામા ફિલ્મ 'માતૃભૂમિ'ને લઈને ચાહકોમાં ઉત્સુકતા વધી રહી છે. અગાઉ 'બેટલ ઑફ ગલવાન' નામથી જાહેર થયેલી આ ફિલ્મનું ટ્રેલર 6 નવેમ્બર એટલે કે આવતીકાલે મુંબઈમાં લોન્ચ કરવામાં આવશે. ચર્ચા એવી પણ છે કે આ ટ્રેલરને રણબીર કપૂરની આગામી ફિલ્મ 'રામાયણ પાર્ટ 1' સાથે જોડીને સિનેમાઘરોમાં બતાવવામાં આવી શકે છે.
ફિલ્મની જાહેરાત જુલાઈ 2025માં 'બેટલ ઑફ ગલવાન' નામથી કરવામાં આવી હતી. તેનું પ્રી-પ્રોડક્શન વર્ષ 2024માં જ શરૂ થઈ ગયું હતું. જોકે, માર્ચ 2026માં નિર્માતાઓએ ફિલ્મનું નામ બદલીને 'માતૃભૂમિ' કરી દીધું હતું.
ગલવાન ઘાટીની અથડામણથી પ્રેરિત છે ફિલ્મની વાર્તા
'માતૃભૂમિ'ની વાર્તા 15 જૂન 2020ના રોજ લદ્દાખની ગલવાન ઘાટીમાં ભારતીય અને ચીની સૈનિકો વચ્ચે થયેલી હિંસક અથડામણથી પ્રેરિત છે. ફિલ્મમાં સલમાન ખાન ભારતીય સેનાના એક અધિકારીની ભૂમિકામાં જોવા મળશે.
ફિલ્મનું દિગ્દર્શન અપૂર્વ લખિયાએ કર્યું છે. તેમાં સલમાન ખાન સાથે અભિનેત્રી ચિત્રાંગદા સિંહ મુખ્ય ભૂમિકામાં છે. આ ઉપરાંત દિવંગત અભિનેતા પ્રશાંત તમાંગ પણ ફિલ્મની કાસ્ટનો ભાગ છે. દેશભક્તિ, સૈન્ય સંઘર્ષ અને સૈનિકોના બલિદાનને ફિલ્મની વાર્તામાં મહત્વ આપવામાં આવ્યું છે.
11 વર્ષ બાદ સલમાન ખાનની પ્લેબેક સિંગિંગમાં વાપસી
ફિલ્મનું ગીત 'તેરી સેક્સી બ્યુટી' 4 નવેમ્બરે રિલીઝ કરવામાં આવ્યું હતું. આ ગીતમાં સલમાન ખાને પોતાનો અવાજ આપ્યો છે. ગીતમાં ચિત્રાંગદા સિંહ પણ જોવા મળે છે, જે લાલ સાડીમાં ગિટાર વગાડતી નજરે પડે છે.
આ ગીત સાજિદ ખાને લખ્યું અને કમ્પોઝ કર્યું છે, જ્યારે મુસ્કાને ફિમેલ વૉઇસ આપ્યો છે. ખાસ વાત એ છે કે સલમાન ખાન લગભગ 11 વર્ષ બાદ ફરી પ્લેબેક સિંગિંગમાં પરત ફર્યા છે.
આ પહેલાં તેમણે 2014માં ફિલ્મ 'કિક'ના ગીત 'હેંગઓવર' અને 2015માં ફિલ્મ 'હીરો'ના ગીત 'મૈં હૂં હીરો તેરા'માં પોતાનો અવાજ આપ્યો હતો. 'માતૃભૂમિ'નું સંગીત હિમેશ રેશમિયાએ તૈયાર કર્યું છે.
ફિલ્મની રિલીઝ ડેટ અંગે હજુ સસ્પેન્સ
'માતૃભૂમિ' ક્યારે સિનેમાઘરોમાં આવશે તે અંગે નિર્માતાઓએ હજુ સુધી સત્તાવાર જાહેરાત કરી નથી. જોકે, મીડિયા રિપોર્ટ્સ અને સોશિયલ મીડિયા પર ચાલી રહેલી ચર્ચાઓ પ્રમાણે ફિલ્મ નવેમ્બર અથવા ડિસેમ્બર 2026માં રિલીઝ થઈ શકે છે.
આ માટે 13 નવેમ્બર, 20 નવેમ્બર અને 11 ડિસેમ્બર જેવી સંભવિત તારીખોની ચર્ચા થઈ રહી છે. જોકે, આમાંથી કોઈ તારીખની સત્તાવાર પુષ્ટિ કરવામાં આવી નથી.
સલમાન ખાનની બીજી ફિલ્મ 'મોન્સ્ટર' પણ ચર્ચામાં
'માતૃભૂમિ' ઉપરાંત સલમાન ખાન પોતાની બીજી આગામી ફિલ્મને લઈને પણ ચર્ચામાં છે. તેઓ દિગ્દર્શક વામશી પૈડિપલ્લી સાથે નવી ફિલ્મમાં કામ કરી રહ્યા હોવાનું કહેવાય છે. આ ફિલ્મનું કથિત નામ 'મોન્સ્ટર' હોવાનું સામે આવ્યું છે. તેમાં સાઉથની જાણીતી અભિનેત્રી નયનતારા પણ જોવા મળી શકે છે.
મીડિયા રિપોર્ટ્સ અનુસાર, આ ફિલ્મ આગામી વર્ષે ઈદના અવસરે રિલીઝ કરવાની યોજના છે. હવે ચાહકોની નજર 'માતૃભૂમિ'ના ટ્રેલર પર છે, જેનાથી ફિલ્મની વાર્તા અને એક્શનની વધુ ઝલક જોવા મળી શકે છે.