સાયબર ઠગાઈના વધતા બનાવો વચ્ચે વડોદરાની Bank of India (BOI) વાઘોડિયા રોડ શાખાના સ્ટાફે સતર્કતા દાખવીને એક સિનિયર સિટીઝન મહિલાને મોટી ઠગાઈથી બચાવી પ્રશંસનીય કાર્ય કર્યું છે. બેંક સ્ટાફની સમયસરની કાર્યવાહીથી ‘ડિજિટલ અરેસ્ટ’ નામની સાયબર ઠગાઈને નિષ્ફળ બનાવવામાં આવી અને મહિલાના રૂ. 35 લાખ સુરક્ષિત રહ્યા.
પ્રાપ્ત માહિતી અનુસાર, તારીખ 31.01.2026ના રોજ BOI વાઘોડિયા રોડ શાખાની સિનિયર સિટીઝન મહિલા ગ્રાહકને સાયબર ઠગોએ ફોન કરીને પોતાને મુંબઈ પોલીસ તરીકે ઓળખ આપીને ડરાવ્યા હતા. ઠગોએ જણાવ્યું હતું કે એક મોટી હોટલ પર દરોડા દરમિયાન મળી આવેલા આધાર કાર્ડમાં તેમનું આધાર કાર્ડ પણ મળી આવ્યું છે અને તેનો ઉપયોગ મની લોન્ડરિંગ, માનવ તસ્કરી, ચાઈલ્ડ ટ્રાફિકિંગ તથા ચાઈલ્ડ પોર્નોગ્રાફી જેવા ગંભીર ગુનાઓમાં થયો હોવાનું કહી મહિલાને ‘ડિજિટલ અરેસ્ટ’ કરવામાં આવી છે.
ઠગોએ આ મામલે કોઈને જાણ ન કરવા માટે કડક સૂચના આપી અને મહિલાને ભયમાં મૂકીને તેમના બેંક ખાતામાં રહેલી તમામ રકમ અન્ય ખાતામાં ટ્રાન્સફર કરવા દબાણ કર્યું હતું. આથી મહિલા પોતાની 35 લાખ રૂપિયાની ફિક્સ ડિપોઝિટ તોડવા માટે બેંકમાં આવી હતી.
મહિલાના ડરેલા ચહેરા અને ચિંતાજનક સ્થિતિને જોઈને બેંક સ્ટાફે ફિક્સ ડિપોઝિટ તોડવાનું કારણ પૂછતાં તેમણે શરૂઆતમાં મેડિકલ ઇમરજન્સી હોવાનું કહી વાત ટાળી હતી. પરંતુ જ્યારે મહિલા દ્વારા RTGS મારફતે મોટી રકમ શંકાસ્પદ ખાતામાં ટ્રાન્સફર કરવા માટે સ્લીપ ભરવામાં આવી, ત્યારે સ્ટાફને સમગ્ર મામલો શંકાસ્પદ લાગ્યો.
તાત્કાલિક BOI વાઘોડિયા રોડ શાખાના મેનેજર શ્રી જીતેશ કુમાર પાંડેએ મામલો પોતાના હાથમાં લઈ મહિલასთან સંવેદનશીલતા અને પ્રેમપૂર્વક વાતચીત કરીને સત્ય હકીકત જાણી લીધી. ત્યારબાદ મેનેજરે મહિલાના મોબાઈલ પરથી સાયબર ઠગો સાથે વાત કરતા જ ઠગોએ પોતાની કપટ લીલા સંકેલી ફોન કટ કરી દીધો.
આ રીતે BOI વાઘોડિયા રોડ શાખાના મેનેજર શ્રી જીતેશ કુમાર પાંડે તથા સમગ્ર ટીમની સતર્કતા અને સમજદારીના કારણે સિનિયર સિટીઝન મહિલાની ‘ડિજિટલ અરેસ્ટ’ નિષ્ફળ બની અને રૂ. 35 લાખની મોટી ઠગાઈ અટકી.
આ મામલે બેંક મેનેજર દ્વારા Vadodara Cyber Crime Policeને જાણ કરવામાં આવી છે. સાયબર ક્રાઈમ પોલીસે છેતરપિંડી કરનારાઓને શોધવા માટે વધુ ટેકનિકલ તપાસ હાથ ધરી છે.
બેંક દ્વારા સામાન્ય નાગરિકોને પણ અપીલ કરવામાં આવી છે કે કોઈપણ અજાણ્યા કોલ, પોલીસ કે અધિકારી બની ડરાવતી વાતો, અથવા તાત્કાલિક પૈસા ટ્રાન્સફર કરવાની માંગ સામે સતર્ક રહે અને તરત જ બેંક અથવા સાયબર ક્રાઈમ વિભાગનો સંપર્ક કરે.
