ચેન્નાઈ: તમિલનાડુની રાજનીતિમાં આ વખતની ચૂંટણી માત્ર સત્તા પરિવર્તનની વાર્તા નથી, પરંતુ દાયકાઓ જૂના રાજકીય સમીકરણો બદલાવાનો સ્પષ્ટ સંકેત છે. અભિનેતામાંથી નેતા બનેલા થલાપતિ વિજયે પોતાની પ્રથમ ચૂંટણીમાં જ પ્રસ્થાપિત દ્રવિડ પક્ષોના વર્ચસ્વને જોરદાર પડકાર ફેંક્યો છે. તેમની પાર્ટી TVK (તમિલગ વેટ્રી કઝગમ) 108 બેઠકો પર જીત મેળવીને રાજ્યમાં એક શક્તિશાળી પક્ષ તરીકે ઉભરી છે. જોકે, 118ના બહુમતીના આંકડાથી માત્ર 10 બેઠકો દૂર હોવાથી સત્તા સુધી પહોંચવાનો માર્ગ અત્યંત રસપ્રદ અને જટિલ બન્યો છે. આ પરિણામો સ્પષ્ટ કરે છે કે તમિલનાડુની જનતા પરિવર્તન તો ઈચ્છે છે, પરંતુ પૂર્ણ સત્તા કોઈ એક પક્ષના હાથમાં સોંપવા હજુ તૈયાર નથી.
તમિલનાડુના રાજકીય ઈતિહાસમાં એમ.જી. રામચંદ્રન અને જે. જયલલિતા જેવા ફિલ્મી સિતારાઓએ ભવ્ય સફળતા મેળવી છે, પરંતુ તાજેતરના વર્ષોમાં રજનીકાંત અને કમલ હાસન જેવા દિગ્ગજો પોતાની લોકપ્રિયતાને મતમાં ફેરવવામાં નિષ્ફળ રહ્યા હતા. થલાપતિ વિજયે આ પેટર્નને તોડીને એક નવો ઈતિહાસ રચ્યો છે. તેમની રેલીઓમાં ઉમટેલી યુવાઓ અને શહેરી મતદારોની ભારે ભીડ દર્શાવે છે કે TVK એ ‘એન્ટી-ઇન્કમ્બન્સી’ અને ‘નવા વિકલ્પ’ની લોકભાવનાને સફળતાપૂર્વક ઝડપી લીધી છે. ખાસ કરીને દલિત અને ખ્રિસ્તી વોટ બેંક, જે પરંપરાગત રીતે DMKની મનાતી હતી, તેમાં વિજયે મોટું ગાબડું પાડ્યું છે.
હવે અસલી લડાઈ સરકાર બનાવવાની છે, જેમાં વિજય સામે ચાર મુખ્ય માર્ગો દેખાઈ રહ્યા છે. પ્રથમ વિકલ્પ કોંગ્રેસ સાથેના ગઠબંધનનો છે, જે વૈચારિક રીતે સરળ હોઈ શકે છે. બીજો વિકલ્પ NDA કે ભાજપનો સાથ લેવાનો છે, પરંતુ વિજય અગાઉ ભાજપને ‘વૈચારિક દુશ્મન’ ગણાવી ચૂક્યા હોવાથી આ માર્ગ જોખમી સાબિત થઈ શકે છે. ત્રીજો અને સૌથી વ્યવહારુ વિકલ્પ AIADMK સાથે પોસ્ટ-પોલ ડીલનો છે, જે બંને પક્ષો માટે ફાયદાકારક રહી શકે છે. જ્યારે ચોથો વિકલ્પ PMK અને VCK જેવા નાના પક્ષો તેમજ અપક્ષોને સાથે રાખીને ‘થર્ડ ફ્રન્ટ’ મોડલ બનાવવાનો છે, જોકે તેમાં સરકારની સ્થિરતા સામે પ્રશ્નો ઊભા થઈ શકે છે.
તમિલનાડુમાં એમ.કે. સ્ટાલિનની DMK અને AIADMK વચ્ચે દાયકાઓથી ચાલતા દ્વિ-પક્ષીય જંગમાં હવે વિજય ત્રીજા મજબૂત ધ્રુવ તરીકે સ્થાપિત થયા છે. જનાદેશ અત્યારે ‘સંતુલિત’ છે અને બોલ હવે વિજયના કોર્ટમાં છે. વિજય સામે હવે સૌથી મોટો પડકાર એ છે કે તેઓ પોતાની ‘સિસ્ટમ બદલવાની’ વિચારધારાને વળગી રહેશે કે પછી સત્તાના સમીકરણોમાં ગોઠવાઈને પરંપરાગત રાજનીતિનો હિસ્સો બનશે? સમગ્ર દેશની નજર હવે ચેન્નાઈના રાજકીય ઘટનાક્રમ પર ટકેલી છે.
