અમદાવાદ: ભારતીય શેરબજાર અને કોમોડિટી માર્કેટ માટે આજનો શુક્રવાર અત્યંત નિરાશાજનક સાબિત થયો છે. વૈશ્વિક બજારોના નબળા સંકેતો અને ખાસ કરીને પશ્ચિમ એશિયામાં ઈરાન-ઈઝરાયલ વચ્ચે વધતા યુદ્ધના તણાવને કારણે ભારતીય શેરબજારમાં 'બ્લેક ફ્રાઈડે' જેવો માહોલ જોવા મળ્યો હતો. બજાર ખુલતાની સાથે જ રોકાણકારોમાં ફફડાટ વ્યાપી ગયો હતો અને મોટા પાયે વેચવાલી નીકળતા સેન્સેક્સ અને નિફ્ટી બંને મહત્વની સપાટીઓ તોડી નીચે સરક્યા હતા.
બજારના આંકડાઓ પર નજર કરીએ તો, BSE સેન્સેક્સ આજે 835 પોઈન્ટના તોતિંગ ઘટાડા સાથે 77,003.43 ની સપાટીએ પહોંચ્યો છે. તેવી જ રીતે નેશનલ સ્ટોક એક્સચેન્જનો નિફ્ટી-50 પણ 229 પોઈન્ટ તૂટીને 24,000 ની મનોવૈજ્ઞાનિક સપાટીની નીચે 23,997.50 પર ટ્રેડ થઈ રહ્યો હતો. બેન્કિંગ, આઈટી અને રિયલ્ટી સેક્ટરના શેરોમાં સૌથી વધુ રક્તપાત જોવા મળ્યો હતો, જેના કારણે રોકાણકારોના કરોડો રૂપિયા ધોવાઈ ગયા છે.
માત્ર ઇક્વિટી માર્કેટ જ નહીં, પણ કિંમતી ધાતુઓમાં પણ આજે મોટો કડાકો જોવા મળ્યો છે. MCX (મલ્ટી કોમોડિટી એક્સચેન્જ) પર સોનાના ભાવમાં પ્રતિ કિલો અંદાજે ₹1,011 નો ઘટાડો નોંધાયો છે, જેના કારણે સોનું ₹1,50,945 ના સ્તર પર આવી ગયું છે. બીજી તરફ ચાંદીમાં વધુ ગંભીર સ્થિતિ જોવા મળી છે. ચાંદીના ભાવમાં ₹2,313 નો મસમોટો ઘટાડો આવતા તે ₹2,40,087 ના સ્તરે કારોબાર કરી રહી છે. વૈશ્વિક સ્તરે ડૉલરની મજબૂતી અને રોકાણકારો દ્વારા પ્રોફિટ બુકિંગને કારણે કિંમતી ધાતુઓના ભાવ દબાયા છે.
બજારના નિષ્ણાતો માની રહ્યા છે કે મધ્ય પૂર્વમાં વધી રહેલી અસ્થિરતા અને અમેરિકી નૌકાદળની સક્રિયતાને કારણે રોકાણકારો જોખમ લેવાનું ટાળી રહ્યા છે. આ ઉપરાંત, વિદેશી સંસ્થાકીય રોકાણકારો (FII) દ્વારા ભારતીય બજારમાંથી સતત મૂડી પાછી ખેંચવામાં આવી રહી છે, જે બજારના ઘટાડાનું મુખ્ય કારણ છે. આગામી દિવસોમાં જો ભૌગોલિક રાજકીય સ્થિતિ વધુ વણસશે, તો બજારમાં હજુ પણ વધુ અસ્થિરતા જોવા મળી શકે છે.
