રાષ્ટ્રપતિ દ્રૌપદી મુર્મૂની વૃંદાવન મુલાકાત પહેલા વાંદરા ત્રાસ સામે તંત્રનો અનોખો પ્લાન અમલમાં

રાષ્ટ્રપતિ દ્રૌપદી મુર્મૂના 19 માર્ચથી શરૂ થનારા વૃંદાવન પ્રવાસ પહેલા વાંદરાઓના વધતા ત્રાસને ધ્યાનમાં રાખીને તંત્ર એલર્ટ થયું છે. પ્રવાસ દરમિયાન કોઈ અવરોધ ન આવે તે માટે વાંદરાઓને દૂર રાખવા લંગૂરના કટઆઉટ લગાવવાનો અનોખો નિર્ણય લેવાયો છે, કારણ કે કાયદાકીય મર્યાદાઓને કારણે અસલી લંગૂરનો ઉપયોગ શક્ય નથી.

વૃંદાવનમાં વાંદરાઓ ખાસ કરીને પ્રવાસીઓના ચશ્મા છીનવી લેતા હોવાથી સુરક્ષા માટે ખાસ આયોજન કરવામાં આવ્યું છે. રાષ્ટ્રપતિના કાર્યક્રમમાં આશ્રમ અને હોસ્પિટલ મુલાકાત સાથે ગોવર્ધન પરિક્રમાનો સમાવેશ થાય છે, જેને ધ્યાનમાં રાખીને તમામ સ્થળોએ સાવચેતી વધારવામાં આવી છે.

વાંદરાઓના ત્રાસને કાબૂમાં લેવા માટે વન વિભાગની 30 સભ્યોની વિશેષ ટીમ તૈનાત કરવામાં આવી છે. આ ટીમ ગુલેલ, લાઠી અને લેસર લાઈટ જેવા સાધનોનો ઉપયોગ કરીને સતત નજર રાખશે અને અનોખા ઉપાયોથી પ્રવાસને નિર્વિઘ્ન બનાવવાનો પ્રયાસ કરશે.