નવી દિલ્હી: પશ્ચિમ એશિયામાં ઈરાન અને ઈઝરાયેલ વચ્ચે વધતા જતા યુદ્ધના તણાવ અને વૈશ્વિક અસ્થિરતાની વચ્ચે ભારતના સંરક્ષણ મંત્રી રાજનાથ સિંહે દેશની સુરક્ષાને લઈને અત્યંત આક્રમક વલણ અપનાવ્યું છે. તેમણે સ્પષ્ટ શબ્દોમાં ચેતવણી આપતા જણાવ્યું છે કે, વર્તમાન વૈશ્વિક સ્થિતિનો ફાયદો ઉઠાવી જો કોઈ પડોશી દેશ 'દુસ્સાહસ' કે 'ખોટી હરકત' કરવાની કોશિશ કરશે, તો ભારતનો વળતો પ્રહાર અભૂતપૂર્વ અને નિર્ણાયક હશે. રાજનાથ સિંહે ભારપૂર્વક કહ્યું કે, દેશની સુરક્ષા અમારી સર્વોચ્ચ પ્રાથમિકતા છે અને ભારતીય સશસ્ત્ર દળો કોઈપણ પડકારને જડબાતોડ જવાબ આપવા માટે સંપૂર્ણ રીતે સજ્જ છે.
દેશવાસીઓને સંબોધતા સંરક્ષણ મંત્રીએ ભરોસો આપ્યો હતો કે સરકાર પશ્ચિમ એશિયાના સંઘર્ષ પર ઝીણવટભરી નજર રાખી રહી છે. તેમણે ઉમેર્યું કે, "સ્થિતિ ગંભીર ચોક્કસ છે, પરંતુ ગભરાવાની જરૂર નથી. જો કોઈ ઉશ્કેરણીજનક પગલાં લેશે તો ભારત આ વખતે તેને સહન નહીં કરે." પીએમ મોદીના નેતૃત્વમાં સતત ઉચ્ચ સ્તરીય બેઠકો યોજાઈ રહી છે અને કોઈપણ કટોકટીનો સામનો કરવા માટેની વ્યૂહનીતિ તૈયાર કરી લેવામાં આવી છે. સરકાર કડક વલણ અપનાવીને જનતાનો વિશ્વાસ જાળવી રાખવા કટિબદ્ધ છે.
યુદ્ધના કારણે દેશમાં પેટ્રોલ-ડીઝલની અછત સર્જાશે તેવી ફેલાઈ રહેલી અફવાઓ પર રાજનાથ સિંહે પૂર્ણવિરામ મૂક્યું છે. તેમણે ખાતરી આપી છે કે દેશમાં પેટ્રોલ, ડીઝલ કે રસોઈ ગેસના પુરવઠામાં કોઈ જ ખામી નથી અને પુરવઠો સંપૂર્ણપણે સામાન્ય છે. કેટલાક તત્વો ખોટી માહિતી ફેલાવીને ડરનો માહોલ બનાવી રહ્યા છે, જેથી નાગરિકોએ આવી અફવાઓથી દૂર રહેવું જોઈએ. આ સાથે જ વિદેશમાં ફસાયેલા ભારતીયોની સુરક્ષા માટે પણ સરકારે જરૂરી એક્શન પ્લાન તૈયાર કર્યો હોવાનું તેમણે જણાવ્યું હતું.
અંતમાં રાજનાથ સિંહે દેશના હિતમાં સૌને રાજનીતિથી ઉપર ઉઠીને એકજૂથ રહેવા અપીલ કરી હતી. તેમનો આ સંદેશ સ્પષ્ટ સંકેત આપે છે કે ભારત હવે વૈશ્વિક મંચ પર નબળું નથી અને પોતાની સરહદોની રક્ષા કરવા માટે કોઈપણ હદ સુધી જઈ શકે છે. દેશની સુરક્ષા સાથે કોઈ પણ પ્રકારની સમજૂતી કરવામાં આવશે નહીં તેવો મજબૂત સંદેશ આ નિવેદન દ્વારા દુનિયાભરમાં પહોંચ્યો છે.
