નવસારી જિલ્લામાં ગેરકાયદેસર દારૂની હેરાફેરી સામે પોલીસે કાર્યવાહી તેજ કરી છે. ગણદેવી પોલીસે ખારેલ ઓવરબ્રિજ નજીક વોચ ગોઠવીને વિદેશી દારૂ અને બિયરના જથ્થા સાથે એક શખ્સને ઝડપી પાડ્યો છે. પોલીસે દારૂના જથ્થા ઉપરાંત તેને લઈ જવા માટે ઉપયોગમાં લેવાયેલો ટેમ્પો અને મોબાઇલ ફોન પણ કબજે કર્યો છે.
પોલીસને મળેલી બાતમીના આધારે PSI એન.એ. પટેલ સહિતની ટીમે ખારેલ ઓવરબ્રિજ નીચે વાહનોની તપાસ શરૂ કરી હતી. દરમિયાન સેલવાસ-વાપી તરફથી આવતો સફેદ રંગનો ટાટા ACE ગોલ્ડ ટેમ્પો શંકાસ્પદ જણાતા તેને અટકાવી તપાસ કરવામાં આવી હતી.
ટેમ્પોમાં બ્લૂ તાડપત્રી નીચે તપાસ કરતાં વિદેશી દારૂ અને બિયરનો જથ્થો મળી આવ્યો હતો. પોલીસે કુલ 1,152 બોટલ અને ટીન, અંદાજે 299.52 લિટર, જેની કિંમત આશરે ₹3.40 લાખ હોવાનું જણાવાયું છે, તે કબજે કર્યા હતા.
આ કેસમાં પોલીસે નરેન્દ્રસીંગ લાલજી સિંહ પરસ્તે, ઉંમર 27 વર્ષ, રહે. ઉમરગામને ઝડપી પાડ્યો છે. તેની પાસેથી દારૂ-બિયરના જથ્થા ઉપરાંત આશરે ₹2.50 લાખની કિંમતનો ટાટા ACE ટેમ્પો અને ₹5 હજારનો મોબાઇલ ફોન મળી કુલ ₹5.95 લાખનો મુદ્દામાલ જપ્ત કરવામાં આવ્યો છે.
પોલીસની પ્રાથમિક પૂછપરછ દરમિયાન દારૂના જથ્થા સાથે સંકળાયેલા હોવાનું કહેવાતા વડોદરાના સોનુસીંગ અને 'કાકા' નામના બે વ્યક્તિઓની વિગતો સામે આવી છે. બંનેની ભૂમિકા અંગે તપાસ હાથ ધરવામાં આવી છે અને તેમને ઝડપી પાડવા માટે પોલીસે વધુ કાર્યવાહી શરૂ કરી છે.
હાલ ગણદેવી પોલીસે સમગ્ર મામલે ગુનો નોંધી આગળની તપાસ હાથ ધરી છે. દારૂનો જથ્થો ક્યાંથી લાવવામાં આવ્યો હતો અને તેને ક્યાં પહોંચાડવાનો હતો તે સહિતના મુદ્દાઓ અંગે પોલીસ દ્વારા તપાસ કરવામાં આવી રહી છે.