અમદાવાદ: અમદાવાદની નિરમા યુનિવર્સિટી ફરી એકવાર ચર્ચામાં આવી છે. ગર્લ્સ હોસ્ટેલ સામે નિર્માણાધીન નવા હોસ્ટેલ બિલ્ડિંગમાં કામ કરતા એક શ્રમિકની કથિત અશોભનીય હરકતોનો વીડિયો સોશિયલ મીડિયા પર વાયરલ થયા બાદ વિદ્યાર્થીઓમાં રોષ જોવા મળી રહ્યો છે. આ મામલે વિદ્યાર્થીઓએ યુનિવર્સિટી પ્રશાસનની કાર્યવાહી સામે સવાલ ઉઠાવ્યા છે.
વિદ્યાર્થીઓના જણાવ્યા પ્રમાણે, ઘટનાને લઈને ફરિયાદ કર્યા બાદ પણ સંતોષકારક કાર્યવાહી ન થતાં સોશિયલ મીડિયા મારફતે વિરોધ શરૂ કરવામાં આવ્યો હતો. આ વિરોધના ભાગરૂપે 1 ઓક્ટોબરે વિદ્યાર્થીઓએ કાળા કપડાં પહેરીને કેમ્પસમાં ‘બ્લેક ડે’ મનાવ્યો હતો.
ગર્લ્સ હોસ્ટેલ સામેના નિર્માણાધીન બિલ્ડિંગનો મામલો
વિદ્યાર્થીઓના જણાવ્યા મુજબ, નિરમા યુનિવર્સિટીના ગર્લ્સ હોસ્ટેલના H-4 બ્લોકની સામે નવા ગર્લ્સ હોસ્ટેલનું બાંધકામ ચાલી રહ્યું છે. આ દરમિયાન H-5 બ્લોકમાં કામ કરતા એક શ્રમિક દ્વારા વિદ્યાર્થિનીઓ તરફ કથિત અશોભનીય વર્તન કરવામાં આવ્યું હોવાનો આક્ષેપ છે.
વિદ્યાર્થિનીઓએ આ ઘટનાનો વીડિયો સાથે યુનિવર્સિટી પ્રશાસન સમક્ષ ફરિયાદ કરી હોવાનો દાવો કર્યો છે.
કાર્યવાહી અંગે વિદ્યાર્થીઓમાં નારાજગી
વિદ્યાર્થીઓનો આક્ષેપ છે કે ફરિયાદ બાદ સંબંધિત વ્યક્તિ સામે તાત્કાલિક અને યોગ્ય કાર્યવાહી કરવાને બદલે ગર્લ્સ હોસ્ટેલની બાજુમાં લીલા રંગની નેટ લગાવવામાં આવી હતી. કેટલાક વિદ્યાર્થીઓના જણાવ્યા પ્રમાણે, આ સમગ્ર મામલે પ્રશાસનના પ્રતિભાવથી તેઓ સંતુષ્ટ નથી.
વિદ્યાર્થીઓએ વધુમાં એવો પણ આક્ષેપ કર્યો છે કે ઘટનાને લઈને ફરિયાદ કરનાર વિદ્યાર્થિનીઓને તેમના વસ્ત્રો અંગે પણ ટિપ્પણી કરવામાં આવી હતી. આ બાબતે પણ વિદ્યાર્થીઓમાં નારાજગી જોવા મળી રહી છે.
સોશિયલ મીડિયા પર શરૂ થયો વિરોધ
કેમ્પસમાં સીધો વિરોધ કરવાને બદલે વિદ્યાર્થીઓએ સોશિયલ મીડિયા મારફતે પોતાની વાત રજૂ કરવાનું શરૂ કર્યું હતું. Instagram સહિતના સોશિયલ મીડિયા પ્લેટફોર્મ પર કેમ્પિયન ચલાવીને વધુ વિદ્યાર્થીઓને જોડાવા માટે અપીલ કરવામાં આવી હતી.
વિદ્યાર્થીઓ દ્વારા 1 ઓક્ટોબરે કાળા કપડાં પહેરીને યુનિવર્સિટી કેમ્પસમાં પહોંચીને ઘટનાના વિરોધમાં ‘બ્લેક ડે’ મનાવવાનું નક્કી કરવામાં આવ્યું હતું.
પ્લેકાર્ડ સાથે વિદ્યાર્થીઓનો વિરોધ
ગુરુવારે મોટી સંખ્યામાં વિદ્યાર્થીઓ કાળા કપડાં પહેરીને કેમ્પસમાં એકઠા થયા હતા. વિદ્યાર્થીઓએ હાથમાં પ્લેકાર્ડ લઈને પોતાની નારાજગી વ્યક્ત કરી હતી. આયોજકોના જણાવ્યા પ્રમાણે, વિરોધમાં 1,000થી વધુ વિદ્યાર્થીઓ જોડાયા હતા.
વિદ્યાર્થીઓની મુખ્ય માંગમાં ઘટનાની યોગ્ય તપાસ, જવાબદાર વ્યક્તિ સામે કાર્યવાહી અને કેમ્પસમાં વિદ્યાર્થિનીઓની સુરક્ષા માટે યોગ્ય વ્યવસ્થા કરવાની માંગનો સમાવેશ થાય છે.
યુનિવર્સિટી તરફથી સત્તાવાર સ્પષ્ટતા પર નજર
આ સમગ્ર મામલે વિદ્યાર્થીઓ દ્વારા કરવામાં આવેલા આક્ષેપો અને સોશિયલ મીડિયા પર વાયરલ થયેલા વીડિયોની સત્યતા અંગે સત્તાવાર તપાસ જરૂરી છે. સાથે જ, યુનિવર્સિટી પ્રશાસન દ્વારા આ ઘટનાને લઈને શું કાર્યવાહી કરવામાં આવી છે અને વિદ્યાર્થીઓની ફરિયાદ અંગે તેનું સત્તાવાર વલણ શું છે તે અંગેની સ્પષ્ટતા પણ મહત્વપૂર્ણ બની છે.
હાલમાં વિદ્યાર્થીઓના વિરોધ બાદ સમગ્ર મામલો વધુ ચર્ચામાં આવ્યો છે અને યુનિવર્સિટી પ્રશાસનના આગામી પગલાં પર સૌની નજર છે.