NEET 2026 પેપર લીક કાંડ બાદ કેન્દ્ર સરકારનો ઐતિહાસિક નિર્ણય; ૨૧ જૂને યોજાશે નવી પરીક્ષા અને ૧૪ જૂનથી એડમિટ કાર્ડ જાહેર થશે.
કેન્દ્રીય શિક્ષણ મંત્રી ધર્મેન્દ્ર પ્રધાને એક મહત્ત્વની પ્રેસ કોન્ફરન્સ યોજીને દેશના લાખો વિદ્યાર્થીઓ માટે મોટી જાહેરાત કરી છે. NEET 2026ની પરીક્ષાનું પેપર ફૂટ્યા બાદ સરકારે આ મામલે CBI તપાસ સોંપી દીધી છે. શિક્ષણ મંત્રીએ કડક શબ્દોમાં ચેતવણી આપતા જણાવ્યું છે કે, આ કૌભાંડમાં સામેલ તમામ દોષિતોને 'પાતાળમાંથી પણ શોધી કાઢીને' કડક સજા કરવામાં આવશે. તેમણે ઉમેર્યું કે સરકારની લડાઈ પરીક્ષા માફિયાઓ સામે છે અને સોશિયલ મીડિયા પર ફેલાતી અફવાઓથી વિદ્યાર્થીઓએ દૂર રહેવું જોઈએ.
પેપર લીક જેવી ગંભીર ઘટનાઓ પર કાયમી લગામ લગાવવા માટે સરકારે એક મોટો અને ઐતિહાસિક નિર્ણય લીધો છે. આગામી વર્ષથી NEET UG ની પરીક્ષા સંપૂર્ણપણે ઓનલાઈન એટલે કે કોમ્પ્યુટર બેઝ્ડ (CBT) મોડ પર જ યોજાશે. હવેથી પરંપરાગત OMR શીટનો વિકલ્પ હંમેશા માટે હટાવી દેવામાં આવશે અને દરેક વિદ્યાર્થીએ કોમ્પ્યુટર પર જ પરીક્ષા આપવાની રહેશે. ઓનલાઈન સિસ્ટમને કારણે પરીક્ષાની સુરક્ષા વધુ મજબૂત બનશે અને ગેરરીતિની શક્યતાઓ નહિવત થઈ જશે.
નેશનલ ટેસ્ટિંગ એજન્સી (NTA) દ્વારા NEET 2026 ની નવી તારીખો જાહેર કરી દેવામાં આવી છે. હવે આ રદ થયેલી પરીક્ષા આગામી ૨૧ જૂનના રોજ ફરીથી લેવામાં આવશે, જેના એડમિટ કાર્ડ ૧૪ જૂન સુધીમાં ઓનલાઈન જારી કરી દેવાશે. આ વખતે સરકારે વિદ્યાર્થીઓની સુવિધા માટે પેપર લખવા માટે ૧૫ મિનિટનો વધારાનો સમય આપવાનું નક્કી કર્યું છે. આ ઉપરાંત, વિદ્યાર્થીઓ પર આર્થિક બોજ ન પડે તેની જવાબદારી પણ સરકાર ઉઠાવશે. વિદ્યાર્થીઓને પોતાની પસંદગીનું પરીક્ષા કેન્દ્ર (શહેર) પસંદ કરવા માટે એક અઠવાડિયાનો સમય આપવામાં આવશે.
શિક્ષણ મંત્રીએ સ્વીકાર્યું હતું કે લાખો મહેનતુ વિદ્યાર્થીઓની મહેનત પર પાણી ફરતા જોઈ પરીક્ષા રદ કરવાનો નિર્ણય ખૂબ જ દુઃખદાયક હતો, પરંતુ ન્યાય માટે આ અનિવાર્ય હતો. તપાસ દરમિયાન સામે આવ્યું હતું કે ૧૨ મે સુધીમાં જ 'ગેસ પેપર' ના નામે અસલી પ્રશ્નપત્રના સવાલો લીક થઈ ગયા હતા. ભવિષ્યમાં આવી ભૂલો ન થાય તે માટે NTA (National Testing Agency) માં 'ઝીરો એરર' સિસ્ટમ લાગુ કરવી એ સરકારની સર્વોચ્ચ પ્રાથમિકતા રહેશે.
