નવી દિલ્હી: મિડલ ઈસ્ટમાં વધતા તણાવ વચ્ચે કેન્દ્ર સરકાર દ્વારા બોલાવવામાં આવેલી સર્વપક્ષીય બેઠકમાં દેશની સુરક્ષા અને આર્થિક સ્થિતિ પર વિગતવાર ચર્ચા કરવામાં આવી હતી. સંરક્ષણ મંત્રી રાજનાથ સિંહની અધ્યક્ષતામાં મળેલી આ બેઠકમાં વિદેશ સચિવે વિપક્ષને ભરોસો આપ્યો હતો કે દેશમાં ઉર્જા સંસાધનોની કોઈ અછત નથી. હોર્મુઝ સ્ટ્રેટમાં ફસાયેલા જહાજોના મુદ્દે સરકારે જણાવ્યું કે ભારતના 4 જહાજો સુરક્ષિત રીતે રવાના થઈ ચૂક્યા છે અને અન્ય 5 જહાજો ટૂંક સમયમાં ભારત પહોંચશે, જે ભારતની રાજદ્વારી સફળતા સૂચવે છે.
પેટ્રોલ-ડીઝલની અછતની અફવાઓ પર વિરામ
બેઠક દરમિયાન વિપક્ષે દેશના વિવિધ ભાગોમાં LPG અને પેટ્રોલ-ડીઝલની અછત અંગે સવાલ ઉઠાવ્યા હતા. જેના જવાબમાં પેટ્રોલિયમ મંત્રી હરદીપ પુરી અને વિદેશ મંત્રી એસ. જયશંકરે સ્પષ્ટ કર્યું હતું કે પુરવઠો સંપૂર્ણપણે સામાન્ય છે અને કોઈપણ પ્રકારની અછત નથી. સરકારે ભારપૂર્વક જણાવ્યું કે વૈશ્વિક સ્થિતિ પર ભારતની સતત નજર છે અને પરિસ્થિતિ સંપૂર્ણપણે કાબૂમાં છે.
PM મોદીની નીતિ સ્પષ્ટ: 'અમે યુદ્ધ નથી ઈચ્છતા'
સરકારે બેઠકમાં માહિતી આપી હતી કે વડાપ્રધાન નરેન્દ્ર મોદીએ અમેરિકી રાષ્ટ્રપતિ સાથે વાતચીત કરી ભારતનું વલણ સ્પષ્ટ કર્યું છે. પીએમ મોદીએ સંદેશ આપ્યો છે કે ભારત શાંતિ અને સંતુલનનો પક્ષધર છે અને "અમે યુદ્ધ ઈચ્છતા નથી." આ ઉપરાંત, ઈરાન સાથે પાકિસ્તાનની મધ્યસ્થી અંગે સરકારે સ્પષ્ટતા કરી હતી કે આ પ્રક્રિયા 1981થી ચાલી રહી છે અને તેમાં કંઈ નવું નથી.
વિપક્ષનો સહયોગ પણ વડાપ્રધાનની ગેરહાજરી પર સવાલ
સંસદીય કાર્ય મંત્રી કિરેન રિજિજૂએ જણાવ્યું કે તમામ પક્ષોએ રાષ્ટ્રીય હિતમાં સરકારને સમર્થન આપવાની ખાતરી આપી છે. જોકે, કોંગ્રેસ અને અન્ય વિપક્ષી દળોએ આ બેઠક મોડી બોલાવવા બદલ અને વડાપ્રધાન મોદીની ગેરહાજરી અંગે નારાજગી વ્યક્ત કરી હતી. કોંગ્રેસે મનમોહન સિંહ અને વાજપેયી જેવા પૂર્વ વડાપ્રધાનોના ઉદાહરણ આપી પીએમ મોદીની ગેરહાજરીને દુર્ભાગ્યપૂર્ણ ગણાવી હતી, જ્યારે TMCએ આ બેઠકમાં ભાગ લીધો ન હતો.
