₹975 કરોડની ટેક્સ નોટિસ! 62 વર્ષના દરજી સાથે એવું શું થયું?
સવારથી સાંજ સુધી સિલાઈ મશીન ચલાવીને મહિને માંડ ₹15 હજાર કમાતા 62 વર્ષના દરજી રેખરાજ ઠાડાને જ્યારે આવકવેરા વિભાગની નોટિસ મળી, ત્યારે તેમના પગ નીચેથી જમીન સરકી ગઈ.
કારણ કે નોટિસમાં તેમને સુરતની એક કંપનીના ડિરેક્ટર બતાવી ₹975 કરોડની ટેક્સ ડિમાન્ડ કરવામાં આવી હતી.
સૌથી ચોંકાવનારી વાત એ છે કે રેખરાજે ક્યારેય ગુજરાતમાં પગ પણ મૂક્યો નથી.
આક્ષેપ છે કે ભેજાબાજોએ તેમના PAN કાર્ડ સહિતના ઓળખ દસ્તાવેજોનો દુરુપયોગ કરીને બોગસ કંપની ઊભી કરી અને કરોડો રૂપિયાના વ્યવહારો કાગળ પર બતાવ્યા.
જ્યારે આ કંપનીના રજિસ્ટર્ડ સરનામે તપાસ કરવામાં આવી તો ત્યાં કોઈ ડાયમંડ કંપની નહીં, પરંતુ જરીના મશીન અને બરફના ગોલા બનાવવાના સાધનોનું રિપેરિંગ વર્કશોપ હોવાનું સામે આવ્યું.
મકાનમાલિકના જણાવ્યા પ્રમાણે તેમનો પરિવાર વર્ષોથી અહીં રહે છે અને તેમને આ નામની કોઈ ડાયમંડ કંપની વિશે જાણ જ નથી.
આટલું જ નહીં, તપાસમાં રેખરાજનું નામ સુરતની અન્ય એક કંપનીમાં પણ ડિરેક્ટર તરીકે નોંધાયેલું હોવાનું સામે આવ્યું.
CAના જણાવ્યા મુજબ આ મામલો આવકવેરા અધિનિયમની કલમ 179 સાથે જોડાયેલો છે, જેના હેઠળ ચોક્કસ પરિસ્થિતિમાં કંપનીની બાકી ટેક્સ જવાબદારી ડિરેક્ટર પાસેથી વસૂલવાની કાર્યવાહી થઈ શકે છે.
આ કેસમાં વર્ષ 2012-13ના વ્યવહારોના આધારે અંદાજે ₹750 કરોડ ટેક્સ અને ₹225 કરોડ પેનલ્ટી, એટલે કે કુલ ₹975 કરોડની ડિમાન્ડ કરવામાં આવી હોવાનું જણાવાયું છે.
હવે રેખરાજે આવકવેરા વિભાગને ઈ-મેલ મારફતે જવાબ આપ્યો છે અને પોતાના દસ્તાવેજોના દુરુપયોગ અંગે પોલીસમાં ફરિયાદ પણ કરી છે.
પરંતુ સવાલ એ છે કે—
એક સામાન્ય દરજીના દસ્તાવેજોનો દુરુપયોગ કરીને કરોડો રૂપિયાની કંપની ઊભી થઈ જાય અને વ્યક્તિને ખબર પણ ન પડે, તો સિસ્ટમમાં ક્યાં ચૂક થઈ?
અને સૌથી મોટો સવાલ—
શું રેખરાજને આ ₹975 કરોડની જવાબદારીમાંથી કાયદાકીય રાહત મળશે?
આ કેસમાં આગળ શું કાર્યવાહી થાય છે તેના પર હવે સૌની નજર છે.